<p style="text-align: justify;"><strong> </strong>جلالاباد (پژواک، ۶ تله ۱۴۰۳): د ننګرهار ولایت په کوز کونړ ولسوالۍ کې د ورښتونو او سېلابونو له امله درې کسان مړه شوي او ۲۰ نور ټپيان دي او لږ تر لږه ۱۵۰ کورونه زیانمن او یا هم وېجاړ شوي دي.</p>
<p style="text-align: justify;">د ننګرهار ولايت د اطلاعاتو او فرهنګ ریاست د اطلاعاتو امر مولوي صدیقالله قریشي د تلې په ۶مه پژواک اژانس ته وويل چې نن سهار په کوز کونړ ولسوالۍ کې شدید باران شوی چې له امله یې سېلابونه راوتلي دي.</p>
<p style="text-align: justify;">دی وايي، د لومړنیو شمېرو له مخې، د سېلاب او باران له امله ۳ کسان مړه شوي او تر شلو ډېر ټپيان دي.</p>
<p style="text-align: justify;">د نوموړي په وینا، ډېر زیانونه د کوز کونړ ولسوالۍ اړوند کنډي، غازي آباد، جنت خان، قلعټک، سلامپور او یو شمېر نورو کلیو خلکو ته اوښتي چې شاوخوا ۱۵۰ کورونه زیانمن او یا ړنګ شوي دي.</p>
<p style="text-align: justify;">دغهراز، مولوي قریشي وايي چې د مروارید کانال هم د سېلاب له کبله تخریب شوی، چې اوبو یې «کهنه ده» کلی زیانمن کړی دی.</p>
<p style="text-align: justify;">د کوز کونړ ولسوالۍ اوسېدونکي بیا د بېړنیو مرستو غوښتنه کوي.</p>
<p style="text-align: justify;">د کوز کونړ اړوند د قلعټک سیمې یوه اوسېدونکي جمشېد پژواک ته وويل، ځينې کورونه په ډېره اندازه تخریب شوي او خلک بېړنیو مرستو ته اړتیا لري.</p>
<p style="text-align: justify;">د یادونې وړ ده چې څو میاشتې مخکې هم سېلابونو د ننګرهار ولایت به سرخرود ولسوالۍ کې خلکو ته درانه مالي او ځاني زیانونه اړولي وو.</p>
