کابل (پژواک، ۱۰ تله ۱۴۰۳): د کابل ښاروالۍ مسوولین وايي، خصوصي سکټور په کابل ښار کې د عامه او خصوصي مشارکت له لارې د ۲،۶ میلیاد افغانیو په ارزښت ۷ پرمختیايي پروژې پلې کوي چې د څلورو پروژو تړونونه لاسلیک شوي دي.
د کابل ښاروالۍ استازي نعمتالله بارکزي پژواک خبري اژانس ته وویل، ښاروالي د سرمایو د جذب برخه کې ډېر پلانونو او پروګرامونو لري چې له دې ډلې «د عامه او خصوصي مشارکت» له لارې څو پروژې د قرارداد تر پړاوه رسولې دي.
هغه زیاته کړه: «د څلورو پروژو قرارداد شوی چې په ټولیز ډول پر دغو څلورو پروژو څه باندې یو میلیارد افغانۍ پانګونه شوې چې د کابل ښار په بېلابېلو ځایونو کې دي، دغه راز درې نورې پروژې د قرارداد په مرحله کې دي چې ټولې اووه پروژې کېږي چې د خصوصي سکټور له لوري به څه باندې ۲.۶ میلیاده افغانۍ پانګونه پرې وشي.»
د هغه په وینا، په یادو پروژو کې د وچې مېوې، د سرو زرو د پلور او د صرافیو مارکېټونو جوړول شامل دي.
بارکزي وویل چې د کابل ښاروالي دروازې پرانیستې او خصوصي سکټور کولای شي د پرمختیايي پروژو په تطبیق کې برخه واخلي.
سرچینې زیاته کړه، د عامه او خصوصي سکټور له لارې له یوې خوا خصوصي سکټور په پرمختیایي او بنسټیزو پروژو کې داخلېږي او له بلې خوا غیرپلاني او هغه ساحې چې کمه استفاده ترې کېږي، پر تجارتي ساحو بدلېږي او د ښار ښکلا ورسره زیاتېږي.
بارکزي دغه راز وویل چې د یادو پروژو په پلې کېدو سره به سلګونه کسانو ته د کار زمینه هم برابره شي.
