په کابل کې د جمناستیک سیالۍ پیل شوې

کابل (پژواک، ۱۱ تله ۱۴۰۳): د کابل ښار له ۱۵ کلپونو څخه د ۱۰۰ ورزشکارانو ترمنځ د جمناستیک ملي لوبډلې ته د لوبغاړو د غوراوي سیالۍ پیل شوې.

د یادو سیالیو د پیل مراسمو کې د جمناستیک فدراسیون فني مرستیال محمدفهیم قیومي وویل، دغه سیالۍ چې نن پیل شوې، دوه ورځې به دوام ولري.

نوموړي وویل، په دغو سیالیو کې د کابل ښار له ۱۵ کلپونو څخه ۱۰۰ ورزشکارانو برخه اخیستې چې په څلورو د ماشومانو، نوي ځوانانو، ځوانانو او لویانو سني کټګوریو کې ترسره کېږي.

هغه زیاته کړه چې دغه سیالۍ د جمناستیک ملي لوبډلې لپاره د غوره ورزشکارانو پیدا کولو په موخه ترسره کېږي.

قیومي وویل، له یادو سیالیو وروسته به په راتلونکې میاشت کې په کابل کې د ولایتونو ورزشکارانو ترمنځ د جمناستیک سیالۍ ترسره شي چې په پای کې به ۲۴ لوبغاړي د هېواد د جمناستیک ملي لوبډلې لپاره وټاکل شي.

نوموړی وایي، کوم کسان کې چې د ملي لوبډلې لپاره ټاکل کېږي، هغه به ایران او یا هم ازبکستان ته د دوو میاشتو تمریني کمپ لپاره ولېږل شي.

همدارنګه په یادو مراسمو کې د بدني روزنې او المپیک ملي کمېټې د دعوت او ارشاد رییس مولوي عطاالله بریال له ورزشکارانو غوښتنه وکړه څو داسې کړنې ترسره نه کړي چې د شریعت له پلوه ناسمې وي.

هغه وویل: «موږ کوښښ د دې کوو چې هر هغه لوبه او ورزش چې له شرعي اړخه کومه ستونزه نه لري، هغه نور هم تقویه شي، کومې لوبې چې شرعي ستونزې لري، کوښښ وکړو څو هغه منکرات او ستونزې چې د شریعت له پلوه ناسمې دي، له منځه یوسو.»

ورته مهال، د یادو سیالیو ګډونوال نعمت‌الله پژواک ته وویل، دغو سیالیو ته یې ډېر چمتووالی نیولی او هیله یې دا ده چې د ملي لوبډلې لپاره به وټاکل شي.

نوموړی وایي، په تېرو کلونو کې د جمناستيک لوبې ته پاملرنه نه ده شوې او له مسوولینو یې غوښتنه وکړه چې یاد ورزش ته دې پاملرنه وکړي او سیالۍ دې ورته جوړې کړي، څو دغه لوبه وده وکړي.