پلعلم (پژواک، ۱۵ تله ۱۴۰۳): په لوګر کې د دولتي ځمکو د غصب مخنیوي کمېسیون وایي، د دغه ولایت په مرکز پلعلم کې شاوخوا ۱۶ سوه جریب غصب شوې ځمکه بېرته راګرځول شوې ده.
په لوګر کې د دولتي ځمکو د غصب مخنیوي کمېسیون یوه غړي عبدالبصر شاهد پژواک خبري اژانس ته وویل، د مرکزي زون د امارتي ځمکو د غصب مخنیوي ځانګړې محکمې د حکم له مخې، د مرکز پلعلم ښار اړوند په وزیر کلا سیمه کې ۱۶ سوه جریب ځمکه امارتي اعلان شوه.
شاهد زیاته کړه، د یادې سیمې اوسېدونکو له دې مخکې د وزیر کلا پر دښته دعوه لرله چې شاوخوا ۱۸۰ کاله پخوا یې پلرونو پېرلې ده او په ځینو سیمو کې د ودانیو جوړولو چارې هم پيل شوې وې.
د ده په وینا، د ځايي خلکو د ملکیت ټول اسناد د محکمې له لوري باطل ثابت شوي او د یادې سیمې اوسېدونکي نه شي کولای چې له دې وروسته د وزیر کلا دښته کې کورونه جوړ او یا هم پر یاده ځمکه کرکېله وکړي.
بل لور ته، د وزیر کلا سیمې یوه اوسېدونکي محمدنبي پژواک ته وویل، رښتیا هم یاده ځمکه دولتي اعلان شوې ده.
نوموړي زیاته کړه، د وزیر کلا دښته دوی ته له نېکونو او پلرونو ورپاتې وه، خو اوس مهال اصلي اسناد په واک نه لري او یاد اسناد د تېرو جګړو له امله له منځه تللي دي.
د دولتي ځمکو د غصب مخنیوي کمېسیون د معلوماتو له مخې، په تېرو دوو کلونو کې په لوګر کې ۲۵ زره جریب ځمکه له غصبه راګرځول شوې او سل زره جریب نوره تر څېړنې لاندې ده.
