<p style="text-align: justify;">کابل (پژواک، ۱۹ تله ۱۴۰۳): د کانونو او پټرولیم وزارت له یوه ازبکستاني شرکت سره د جوزجان د طوطي میدان ګازو د اکتشاف او استخراج تړون لاسلیک کړ او یاد شرکت به په لومړي کال کې ۱۰۰ میلیونه او په لسو کلونو کې یو میلیارد امریکایي ډالر پانګونه وکړي.</p>
<p style="text-align: justify;">دغه تړون نن په کابل کې د حکومت د اطلاعاتو او رسنیو مرکز کې د افغانستان د کانونو او پټرولیم وزارت سرپرست ملا هدایتالله بدري او د ازبکستان هېواد (ایریل) شرکت استازي نادر بابیف ترمنځ لاسلیک شو.</p>
<p style="text-align: justify;">د کانونو او پټرولیم وزارت سرپرست د یاد تړون د لاسلیک مراسمو کې وویل: «د نن ورځې غونډه د اقتصادي پرمختګ او د انرژۍ د خپلواکۍ په موخه یو مهم پړاو دی، لکه څنګه چې موږ د طوطي میدان ګازي بلاک لپاره د افغانستان د کانونو او پټرولیم وزارت او ایریل شرکت ترمنځ د دې تړون د لاسلیک کولو لپاره راټول شوي یو.»</p>
<p style="text-align: justify;">دی وايي، یاد بلاک د امو دریا حوزې اړوند دی، جوزجان ولایت کې موقعیت لري، شاوخوا ۷۰۰۰ کیلومتر مربع مساحت لري او (ایریل) شرکت په لومړي کال کې ۱۰۰ میلیون او په لسو کلونو کې یو میلیارد امریکایي ډالر پانګونه کوي.</p>
<p style="text-align: justify;">د کانونو وزارت سرپرست همدارنګه وویل، یاد ازبکستاني شرکت به په لومړنیو دوو کلونو کې ۱۰۰ مېګاواټه برېښنا د ګاز په وسیله جوړوي چې د برېښنا زیاتوالي په برخه کې یو مثبت ګام دی.</p>
<p style="text-align: justify;">هغه زیاته کړه، سربېره پر دې به یاد شرکت په لومړیو دوو کلونو کې لږ تر لږه ۱۵۰۰ کیلومتر مربع دوه بعدي او ۱۰۰۰ کیلومتر مربع درې بعدي سروې ترسره کړي چې د یادې سروې ترسره کول به په افغانستان کې د نوي ګازي سرچینو کشف او د مسلکي استخراج لامل وګرځي.</p>
<p style="text-align: justify;">دی زیاتوي، د دغه تړون په عملي کېدو سره به نه یوازې کاري فرصتونه برابر شي، بلکې د افغانستان ګازي اړتیاوې به پوره او د عوایدو د زیاتوالي سبب به شي.</p>
<p style="text-align: justify;">د بدري په خبره، د تړون لومړنی کال ازمایښتي دی او که یاد شرکت لومړني کال کې ټولې ژمنې ترسره نه کړي، تړون فسخه کېږي.</p>
<p style="text-align: justify;">د کانونو او پټرولیم وزارت ویاند همایون افغان پژواک ته وویل چې دغه تړون د ۲۵ کلونو لپاره لاسلیک شو.</p>
ده زیاته کړه، د طوطي میدان د ګازو ډېره سیمه په جوزجان ولایت کې پرته او یوه برخه ېې د فاریاب ولایت اړوند ده.
