<p style="text-align: justify;">کابل (پژواک، ۶ لړم ۱۴۰۳): د ازادو سیالیو افغان ورزشکار فرید بشارت په «UFC» نړۍوال سازمان کې خپل برازیلي سیال ته ماتې ورکړه.</p>
<p style="text-align: justify;">دغه سیالي تېره شپه د «UFC» په نړۍوال سازمان کې ترسره شوه چې په کې د ازادو سیالیو افغان ورزشکار فرید بشارت خپل برازیلي سیال ویکټور هوګو ته ماتې ورکړه.</p>
<p style="text-align: justify;">همدارنګه د فرید بشارت ورور جاوید بشارت پر خپله فېسبوک پاڼه یو انځور خپور کړی او ورسره لیکلي یې دي: «د فرید بشارت بریا مو مبارک شه.»</p>
<p style="text-align: justify;">یاده سیالي د متحده عربي اماراتو په ابوظبي ښار کې ترسره شوه.</p>
<p style="text-align: justify;">د معلوماتو له مخې، فرید بشارت چې اوس په انګلستان کې اوسېږي، تر دې مهاله یې ۱۳ سیالۍ کړې دي او ټولې یې ګټلې دي.</p>
<p style="text-align: justify;">د یادونې ده چې د فرید بشارت برازیلي سیال بیا له دې مخکې ۲۵ سیالۍ ګټلي او څلور یې بایللې دي.</p>
