د بغلان والي: خلک دې چارواکو ته د ښې حکومتولۍ په موخه لازمې مشورې ورکړي

پلخمري (پژواک، ۷ لړم ۱۴۰۳): د بغلان والي وایي، خلک باید د لا ښې حکومتولۍ رامنځته کېدو په موخه حکومتي چارواکو ته لازمې مشورې ورکړي.

د بغلان والي مولوي عبدالرحمن حقاني نن په دغه ولایت کې له خلکو سره د امنیت، اقتصادي پیاوړتیا، بیارغونې او ښې حکومتولۍ په اړه جوړه شوې غونډه کې وویل، په افغانستان کې له شاوخوا پنځوس کلونو وروسته یو سراسري امنیت رامنځته شوی خو د ساتنې لپاره یې لازمو اقداماتو ته اړتیا ده.

هغه زیاته کړه، په ځینو برخو کې ستونزې شته خو د هواري او د لا ښې حکومتولۍ رامنځته کېدو په موخه باید خلک چارواکو ته لازمې مشورې ورکړي .

دغه راز، د غونډې یوه ګډونوال او د ډنډغوري ولسوالۍ اوسېدونکي محمدکبیر احمدزي وویل، په ښار کې د غیرمسوولو وسله‌والو ګرځېدل خلک پر امنیتي وضعیت بې‌باوره کوي.

 یو شمېر نورو ګډونوالو هم له مسوولینو د ښې حکومتولۍ، ښاري خدمتونو، چاپېریال ساتنې، اقتصادي ودې او بیارغونې برخه کې پوښتنې او غوښتنې وکړې او دغه راز یې خپل وړاندیزونه ورسره شریک کړل چې د مسوولینو له لوري هر اړخیز ډاډ ورکړل شو.