<p style="text-align: justify;">کابل (پژواک، ۱۱ لړم ۱۴۰۳): د افغانستان د صنعت او سوداګرۍ وزارت وايي، د دغه وزارت سرپرست په کابل کې د روسیې له سفیر سره د اقتصادي او سوداګریزو اړیکو پر پراختیا خبرې کړې دي.</p>
<p style="text-align: justify;">د افغانستان د صنعت او سوداګرۍ وزارت پرون (پنجشنبه) د یوې <a href="https://x.com/MoICAfghanistan/status/1851967452222988543">خبرپاڼې</a> په خپرولو په کابل کې د روسیې له سفیر ډیمیټري ژیرنوف سره د دغه وزارت د سرپرست نورالدین عزیزي د لیدنې خبر ورکړی دی.</p>
<p style="text-align: justify;">سرچينې لیکلي، په دې لیدنه کې دواړو لورو د دواړو هېوادونو ترمنځ د اقتصادي او سوداګريزو اړيکو د پياوړتيا او پراختيا په موخه د ګډې کاري ډلې پر جوړولو، د سوداګرۍ او اقتصادي همکاريو، د افغان – روس د سوداګريزو ناستو جوړولو او د شمال – سوېل په نړۍوال ټرانزیټي دهلیز کې د افغانستان د ونډې اخیستو پر چمتوالي خبرې کړې دي.</p>
<p style="text-align: justify;">دغه وزارت زیاته کړې چې د دواړو هېوادونو د ګډو ګټو په پام کې نیولو سره د پروژو پر پیل، په افغانستان کې د کانونو، کرنې، برېښنا او اوبو او صنعت برخو کې د پانګونې پر فرصتونو، رغنده تعامل او د اقتصادي اړیکو د پراختیا پر دوام هم خبرې وشوې دي.</p>
