<p style="text-align: justify;">کابل (پژواک، ۱۴ لړم ۱۴۰۳): د افغانستان د عامې روغتیا وزارت وايي چې په افغانستان کې تر اوسه د مانکي پاکس (بېزو ټناکې) ناروغۍ مثبته پېښه ثبت شوې نه ده.</p>
<p style="text-align: justify;">یاد وزارت پر خپله <strong><a href="https://x.com/MoPH_afg/status/1853045034909618515">اېکسپاڼه </a> </strong>لیکلي چې د دغه وزارت د روغتیایي خدمتونو وړاندې کولو معین مولوي عبدالولي حقاني له کورنیو او نړۍوالو همکارانو سره له مانکي پاکس (بیزوګي ټناکه) ناروغۍ د مخنیوي په اړه خبرې اترې کړې دي.</p>
<p style="text-align: justify;">سرچینه زیاتوي، په یاده ناسته کې چې د روغتیا نړۍوالو سازمانونو استازو او د یاد وزارت ځینو مرکزي رییسانو په کې ګډون درلود، مولوي عبدالولي حقاني د مانکي پاکس ناروغۍ مخنیوي او کنټرول برخه کې د یادو سازمانونو او د وزارت یو شمېر ریاستونو له لوري او د چارو د لا چټکتیا، لازمو تدابیرو نیولو او اسانتیاوو برابرولو لپاره لازمې سپارښتنې وکړې.</p>
<p style="text-align: justify;">د روغتیايي خدمتونو وړاندې کولو معین ویلي: «سره له دې چې تر اوسه د یادې ناروغي هیڅ مثبته پېښه په افغانستان کې ثبت شوې نه ده؛ خو باید لازم چمتووالی ولرو څو هېوادوال مو د بېزو له ټناکې او نورو ساري ناروغیو وساتل شي.»</p>
