<p style="text-align: justify;">کابل (پژواک، ۱۷ لړم ۱۴۰۳): د افغانستان د مرکزي بانک رییس نوراحمد اغا د اسلامي مالي موسسو د محاسبې او تفتیش د سازمان (ایوفي) او اسلامي پراختیايي بانک په ۱۹مه کلنۍ ناسته کې چې په بحرین کې جوړه شوې وه، ګډون وکړ.</p>
<p style="text-align: justify;">د افغانستان بانک د یوې <a href="https://dab.gov.af/dr/%D8%B1%DB%8C%DB%8C%D8%B3-%DA%A9%D9%8F%D9%84-%D8%AF-%D8%A7%D9%81%D8%BA%D8%A7%D9%86%D8%B3%D8%AA%D8%A7%D9%86-%D8%A8%D8%A7%D9%86%DA%A9-%D8%AF%D8%B1-%D9%85%D8%AC%D9%85%D8%B9-%D8%B3%D8%A7%D9%84%D8%A7%D9%86%D9%87-%D8%A7%DB%8C%D9%88%D9%81%DB%8C-%D9%88-%D8%A8%D8%A7%D9%86%DA%A9-%D8%AA%D9%88%D8%B3%D8%B9%D9%87-%D8%A7%D8%B3%D9%84%D8%A7%D9%85%DB%8C-%D8%B4%D8%B1%DA%A9%D8%AA-%DA%A9%D8%B1%D8%AF">خبرپاڼې</a> په خپرولو لیکلي چې دغه ناسته د روانې نومبر میاشتې په درېیمه او څلورمه جوړه شوې وه چې د اسلامي هېوادونو د مرکزي او سوداګریزو اسلامي بانکونو نږدې ۳۰۰ ستازو پکې ګډون کړی و.</p>
<p style="text-align: justify;">نوراحمد اغا د دې ناستې د پیل په مراسمو کې د زکات، وقف، انفاق او صدقې د ورکړې د ښه تنظيم لپاره د بنسټونو پر رامنځته کولو ټينګار کړی او په ټولنه کې يې د بېوزلۍ په کمښت او د شتمنۍ په عادلانه وېش کې د دغو بنسټونو رول مهم بللی دی.</p>
<p style="text-align: justify;">بلخوا، نوموړي دغه راز پر سودي بانکدارۍ د بندیز لګولو او د اسلامي بانکدارۍ د پراختیا او په افغانستان کې د بانکي نظام د ثبات په اړه هم ګډونوالو ته معلومات ورکړل.</p>
<p style="text-align: justify;">د مرکزي بانک رییس له اسلامي پراختیایي بانک او نورو اړوندو بنسټونو د ظرفیت لوړنې، روزنیزو پروګرامونو، د زکات او وقف د ښه مدیریت، اسلامي بانکدارۍ ته د دودیزو بانکونو بدلولو او د یوه حلال، باثباته، شفاف او پیاوړي مالي او اقتصادي نظام د رامنځته کولو برخو کې د همکارۍ غوښتنه کړې ده.</p>
<p style="text-align: justify;"></p>
