فاریاب کې د ترافیکي پېښې له امله یو کس مړ شوی او درې نور ټپیان دي

میمنه (پژواک، ۲۷ لړم ۱۴۰۳): د فاریاب ځايي سرچینې وايي، د دغه ولایت د شیرین‌تګاب ولسوالۍ د نمبر یک پر لویه لار د ترافیکي پېښې له امله یو کس مړ شوی او لږ تر لږه درې نور کسان ټپیان شوي دي.

د فاریاب د ترافیکي پېښو مدیر احمدفهیم کوهي پژواک خبري اژانس ته وویل، یاده پېښه نن سهار د دغه ولایت د شیرین‌تګاب ولسوالۍ د نمبر یک پر لویه لار شوې ده.

نوموړي زیاته کړه: «یو پاسو موټر نن سهار له میمنې ښار څخه د شیرین‌‌تګاب ولسوالۍ پر لور روان و چې کوه صیاد سیمه کې یې له یوه بار وړونکي موټر سره چې پر سرک ولاړ و، ټکر کړی چې په پایله کې د پاسو موټر چلوونکی مړ شوی او د یوې ښځې په ګډون چې شاید د مړ شوي کس مېرمن وي، درې نور کسان ټپیان شوي دي.»

هغه د یادې پېښې لامل د چلوونکي بې‌احتیاطي ګڼلې او زیاته کړې یې ده چې جسد او ټپیان د میمنې روغتون ته لېږدول شوي دي.