<p style="text-align: justify;">مزارشریف (پژواک، ۲۸ لړم ۱۴۰۳): د بلخ مرکز مزارشریف ښار بېلابېلو ناحیو کې د څه باندې ۲۶ میلیون افغانیو په لګښت د شپږو پراختیایي پروژو چارې پیل شوې.</p>
<p style="text-align: justify;">د مزارشریف ښاروالۍ سکټوري رییس جاوید مایار وایي چې د مزارشریف ښار په لومړۍ ناحیه کې د ښاروالۍ له پراختیایي بودجې د څلور میلیون افغانیو په لګښت د ۴۵۰ متره سړک د جوړېدو چارې پیل شوې.</p>
<p style="text-align: justify;">هغه زیاتوي، دغه سړک ۷ متره پلنوالی او دواړو غاړو ته ویالې لري چې د درې میاشتو په موده کې به جوړ او ګټې اخیستنې وسپارل شي.</p>
<p style="text-align: justify;">نوموړی زیاتوي چې د ښاروالۍ له لوري په نهمه ناحیه خبریالانو چوک کې د سړک منځ ګلدان کې د دوه میلیونه افغانیو په لګښت د ۱۲۵۰ مټره فلزي کټارو د نصب چارې پیل شوې.</p>
<p style="text-align: justify;">د مایار په خبره څلور نورې پروژې د ملګرو ملتونو د پروژوي خدماتو ادارې (UNOPS) د ۲۰ میلیون او ۵۰۰ زره افغانیو په مالي ملاتړ د مزارشریف په بېلابېلو ناحیو کې پیل شوې.</p>
<p style="text-align: justify;">مایار دغه راز وایي، د څلور پروژو له ډلې په پنځمه ناحیه کې د یو کیلومتر سړک جغلاچوونه، په نهمه ناحیه کې د ۴۵۰ متره سړک کانکړیتول او په څلورمه ناحیه کې دوه پروژې چې د دوه کیلومتره پلې لارو جوړول دي، شامل دي.</p>
<p style="text-align: justify;">په همدې حال بلخ کې د ملګرو ملتونو پروژوي خدمتونو ادارې مسوول محمدفرید رنجبر وایي، په یادو څلورو پروژو کې شاوخوا ۳۰۰ کسانو ته کاري فرصتونه هم برابر شوي دي.</p>
<p style="text-align: justify;">رنجبر زیاتوي، دغې ادارې تېرو دوو کلونو کې د مزارشریف ښار بېلابېلو ناحیو کې ۴۶ او روان کال به ۳۲ نورې پراختیایي پروژې هم تطبیق کړي چې موخه یې خلکو ته د کاري فرصتونو برابرول او د خلکو اړتیا وړ پروژې پلې کول دي.</p>
<p style="text-align: justify;">بلخوا د مزارشریف ښار اوسېدونکي د دغو پروژو پیل ته خوښ دي.</p>
<p style="text-align: justify;">د نهمې ناحیې دشتشور سیمې اوسېدونکی غلام رسول وایي، خوښ دی چې په دې سیمه کې سړک جوړېږي او د خلکو ستونزې ورسره کمېږي.</p>
<p style="text-align: justify;">هغه دغه راز وایي، د سړک جوړولو سربېره د سیمې شاوخوا ۱۲۰ کسانو ته د کار زمینه هم برابره شوې چې په ورځنۍ توګه ۴۵۰ افغانۍ ترلاسه کوي.</p>
