<p style="text-align: justify;">کابل (پژواک، ۶ لېندۍ ۱۴۰۳): د روسیې د امنیت شورا عمومي منشي په مشرۍ پلاوي د کورنیو چارو او ملي دفاع له سرپرست وزیرانو سره د سیاسي، امنیتي او اقتصادي مسایلو په اړه خبرې کړې دي.</p>
<p style="text-align: justify;">د کورنیو چارو وزارت خبرپاڼه کې راغلي چې د دغه وزارت سرپرست سراجالدین حقاني د روسیې فدراسیون د امنیت شورا له عمومي منشي او مل پلاوي سره وکتل.</p>
<p style="text-align: justify;">سرچينې لیکلي، په دې لیدنه کې دواړو لورو د سیاسي، امنیتي او اقتصادي مسایلو په اړه هر اړخیزې خبرې وکړې.</p>
<p style="text-align: justify;">خبرپاڼه کې راغلي: «د روسیې فدراسیون د امنیت شورا عمومي منشي ډاډ ورکړ چې د روسیې حکومت د طالبانو تحریک چې پخوا یې اسلامي امارت په دې نوم یاداوه، له ممنوعه ډلو د لرې کولو بهیر وروستيو پړاوونه ته رسېدلی، دا مرحله به په لنډ وخت کې بشپړه شي چې له دې سره به د دواړو هېوادونو ترمنځ اړیکې په مختلفو برخو کې پراختیا ومومي.»</p>
<p style="text-align: justify;">د کورنیو چارو سرپرست وزیر سراجالدین حقاني هم په دې لیدنه کې ویلي چې دغه سفر به د دواړو هېوادونو ترمنځ اړیکې په بېلابېلو برخو کې لا پیاوړې کړي.</p>
<p style="text-align: justify;">هغه ویلي، افغانان اوس خپلواک دي، پر خپل سیاسي برخلیک حاکم دي، خپلې فیصلې په خپله کوي او اسلامي امارت نه یوازې د امن افغانستان، بلکې د ټولې سیمې او خطې د ثبات او هوساینې هیله لري.</p>
<p style="text-align: justify;">حقاني دغه راز ویلي، په افغانستان کې جګړه ختمه شوې او د بېثباتۍ ټول عوامل له منځه تللي، نو سیمه باید له دغه فرصته اعظمي ګټه پورته کړي.</p>
<p style="text-align: justify;">د ملي دفاع وزارت په خبرپاڼه کې راغلي چې یاد پلاوی د دغه وزارت له سرپرست ملا محمدیعقوب مجاهد سره هم لیدلي دي.</p>
<p style="text-align: justify;">یاد وزارت لیکلي، ملا محمدیعقوب مجاهد له تور لېسته د اسلامي امارت نوم د ایستلو او د دوه اړخیزو اړیکو د ټینګښت برخو کې د روسیې د هڅو ستاینه وکړه او روسي لوري هم د اسلامي امارت، په ځانګړي ډول د ملي دفاع وزارت هڅې د افغانستان د امنیت او ثبات د ټینګښت برخه کې وستایلې.</p>
<p style="text-align: justify;">د خبرپاڼې له مخې، د ناستې په دوام دواړو لورو د اقتصادي او سوداګریزو همکاریو د پراختیا په اړه ټینګار وکړ او خوښي څرګنده کړه او د بېلابېلو موضوعاتو په اړه یې نظرونه تبادله کړل.</p>
<p style="text-align: justify;">د یادونې ده، یاد پلاوي بېګا د اسلامي امارت د ریاستالوزرا له سیاسي مرستیال مولوي عبدالکبیر، د ریاستالوزرا له اقتصادي مرستیال ملا عبدالغني برادر او د اسلامي امارت له نورو بېلابېلو چارواکو سره هم لیدلي دي.</p>
