دا اونۍ کابل ښار کې د هندي بورې او اوبلن ګاز بیې لوړې شوې دي

کابل (پژواک، ۱۰ لېندۍ ۱۴۰۳): د تېر شنبې په پرتله نن کابل ښار کې د هندي بورې او اوبلن ګاز بیې لوړې شوې، خو د سرو زرو او ډیزل تېلو بیې ټیټې شوې دي.

کابل ښار کې د خوراکي توکو د سوداګرو اتحادیې رییس زمري صافي پژواک خبري اژانس ته وویل، ‎د تېرې شنبې په پرتله نن په عمده ډول د ۴۹ کیلوګرامه هندي بورې بیه د هغه د وارداتو کمېدو له امله له ۲۴۰۰ څخه ۲۴۵۰ افغانیو ته لوړه شوې ده.

صافي وویل چې نن (شنبې) په عمده ډول د ۴۹ کیلوګرامه قزاقي اوړو بیه ۱۴۵۰ افغانۍ، د ۲۴ کیلوګرامه لومړۍ سېله پاکستانیو وریجو بیه ‎۲۶۰۰ افغانۍ، د ۱۶ لېټره مالیزیايي غوړیو بیه ۱۷۰۰ افغانۍ، د یو کیلوګرام افریقایي تور چای بیه ۴۰۰ افغانۍ او د یو کیلوګرام اندونیزیایي شین چای بیه ۳۵۰ افغانۍ ده.

د ځينو توکو پرچون او عمده بیې په یو شمېر مواردو کې لږ خو په ځینو کې بیا ډېر توپیر لري.

د کابل ښار په دهن‌باغ سیمه کې د خوراکي توکو یوه پرچون پلورونکي حامد صوفي‌زاده وویل، نن په پرچون ډول ۴۹ کیلوګرامه قزاقي اوړه په ۱۵۰۰ افغانۍ، ۲۴ کیلوګرامه لومړۍ سېله پاکستانۍ وریجې په ۲۶۵۰ افغانۍ، ۴۹ کیلوګرامه هندۍ بوره په ۲۵۰۰ افغانۍ، ۱۶ لېتره مالیزیايي غوړي په ۱۷۵۰ افغانۍ، یو کیلوګرام اندونیزیایي شین چای په ۴۰۰ افغانۍ او یو کیلوګرام افریقایي تور چای په ۴۵۰ افغانۍ پلورل کېږي.

د سون توکو بیې

د «احمدیار ګروپ» تېلو ټانک یوه کارکوونکي پژواک ته وویل چې نن هم لکه تېره شنبې د یو لېتر پټرولو بیه ۶۰ افغانۍ ده.

هغه زیاته کړه چې د تېرو اوو ورځو مخکې په پرتله نن د یو لېټر ډیزل تېلو بیه له ۴۹ څخه ۵۸ افغانیو ته راټیټه شوې ده.

د هغه په خبره، په نړۍوالو بازارنو کې د تېلو بیې ټيټېدو له امله په کابل ښار کې هم د ډیزلو بیه ټیټه شوې ده.

دغه راز، د کابل ښار په کلوله‌پشته سیمه کې ګاز پلورونکی محمد‌شریف وایي، د تېر شنبې په پرتله نن د یو کیلوګرام ګاز بیه له ۴۸ څخه ۵۰ افغانی ته لوړه شوې ده.

د سرو زرو بیې

د کابل پر تیمورشاهي واټ د حاجي حامد صالح‌زاده زرګرۍ مالک محمدفواد وویل چې تېر شنبې په پرتله نن د‎ یو ګرام ۷۵۰ عیار عربي سرو زرو بیه له ۴۸۵۰ څخه ۴۸۰۰ افغانیو ‎او د یو ګرام ٥٨٥ عیار روسي سرو زرو بیه له ۳۸۵۰ څخه ۳۸۰۰ افغانیو ته راټیټه شوې ده. ‎

د سرو زرو د پلورونکو په خبره، په کابل ښار کې د سرو زرو د بیې بدلون په نړۍوالو بازارونو کې د هغه د بیې له بدلون سره تړاو لري.

د اسعارو بیې

د کابل ښار په شهزاده سرای کې د «صداقت» صرافۍ مالک حاجي محمدحسین پژواک ته وویل چې نن د یوه امریکایي ډالر د پېر بیه ۶۸ افغانۍ ده او زر پاکستانۍ کلدارې په ۲۴۰ افغانیو بدلېږي.

دا په داسې حال کې ده چې د روان کال د لېندۍ میاشتې په ۳مه د یوه امریکايي ډالر د پېر بیه ۶۸ اعشاریه ۱۰ افغانۍ وه او زر پاکستانۍ کلدارې په ۲۴۰ افغانیو تبادله کېدې.