<p style="text-align: justify;">کابل (پژواک، ۱۳ لېندۍ ۱۴۰۳): د فراه ولایت د ابونصر فراهي ګمرک کې د ۳۹ میلیون افغانیو په لګښت دوه هنګرونه جوړ او ګټې اخیستنې ته وسپارل شول او په کاپیسا کې بیا د څلورو رغنیزو پروژو چارې پيل شوې.</p>
<p style="text-align: justify;">د مالیې وزارت له لوري نن په خپره شوې خبرپاڼه کې راغلي چې د ګمرکونو لوی ریاست د څه باندې ۳۹ میلیون افغانیو په لګښت د فراه د ابونصر فراهي ګمرک کې د سوداګریزو توکو خونديتوب په موخه دوه هنګرونه جوړ کړل.</p>
<p style="text-align: justify;">خبرپاڼه کاږي، یاد هنګرونه په معیاري ډول جوړ شوي چې هر یو یې د ۱۰۰ ټنه سوداګریزو توکو زېرمه کولو وړتیا لري.</p>
<p style="text-align: justify;">د خبرپاڼې په حواله، په دغو هنګرونو کې به شاوخوا ۵۰ کسانو ته د کار زمینه هم برابره شي.</p>
<p style="text-align: justify;">خبرپاڼه کې دغه راز راغلي، د دغو هنګرونو د جوړېدو لګښت د مالیې وزارت له پراختیایي بودجې ورکول شوی دی.</p>
<p style="text-align: justify;">د خبرپاڼې د معلوماتو له مخې، د مالیې وزارت له لوري د هېواد د ګمرکونو عصري کولو، د سوداګرو لپاره د اسانتیاوو برابرولو او په هېواد کې د سوداګرۍ د لا ودې په موخه ګڼې ګمرکي پروژې پلې شوې او یو شمېر یې د پلې کېدو په حال کي دي.</p>
<p style="text-align: justify;"><img class="aligncenter wp-image-653157 " src="https://pajhwok.com/wp-content/uploads/2024/12/پروژه-کاپیسا.jpg" alt="" width="701" height="394" /></p>
<p style="text-align: justify;">د یو بل خبر له مخې، د کاپيسا ولایت په مرکز او تګاب ولسوالۍ کې د څلورو رغنیزو پروژو کار پيل شو.</p>
<p style="text-align: justify;">د کاپيسا د کليو پراختیا او بیارغونې رييس مولوي اسد ابرار محمدي وويل چې په دغو پروژو کې د یوه پله، سربند، د اوبو کانال او محافظوي دېوال جوړول شامل دي.</p>
<p style="text-align: justify;">محمدي زیاته کړې، پر یادو پروژو څه باندې پنځه میلیون افغانۍ لګښت راځي چې د ملګرو ملتونو د پرمختیایي پرواګرام له لوري ورکول کېږي.</p>
<p style="text-align: justify;">د کاپیسا ولایت مقام مرستیال مولوي اسدالله سنان وویل، د يادو پروژو په پيلېدو سره يو شمېر خلکو ته د کار زمينه برابره شوه او د کار په بشپړېدو سره به یې سلګونه جریب ځمکه هم خړوبه شي.</p>
