د افغانستان بانک سبا ۱۶ میلیون ډالر لیلاموي

کابل (پژواک، ۱۸ لېندۍ ۱۴۰۳): د افغانستان بانک اعلان کړی چې سبا ۱۶ میلیون امریکایي ډالر د لیلام په ډول پلوري.

یاد بانک په یوه خبرپاڼې کې لیکلي چې سبا (دوشنبه) ۱۶ میلیون امریکایي ډالر د داوطلبۍ له لارې د لیلام په ډول پلوري.

سرچینې پر شرایطو برابر له ټولو سوداګریزو بانکونو، صرافانو او د پولي خدمتونو له شرکتونو غوښتي چې په دې داوطلبۍ کې ګډون وکړي او د داوطلبۍ ګټونکي مکلف دي چې خپل حسابونه د لیلام ورځې تر پایه تصفیه کړي.

مرکزي بانک زیاته کړې: «د اسعارو د لیلام په داوطلبۍ کې د معاملاتو قسمي تسویې ته اجازه نشته، د لیلام ګټونکي باید د خپل ذمت د قیمت پیسې په یو ځل، په نغد ډول او په ټاکلي موده کې د افغانستان بانک ته وسپاري.»