<p style="text-align: justify;">کابل (پژواک، ۱۸ لېندۍ ۱۴۰۳): د ریاستالوزراء اقتصادي معاونیت وايي، د اقتصادي کمېسیون په نوبتي غونډه کې د افغان - ټرانس پروژې په اړه د ټولګټو وزارت د اوسپنې پټلۍ معینیت راپور تایید او اړوندو وزارتونو او ادارو ته یې په اړه لارښوونې وشوې.</p>
<p style="text-align: justify;">د افغانستان، ازبکستان او پاکستان اوسپنې پټلۍ (افغان ټرانس) د بلخ ولایت له مرکز مزارشریف ښاره پیل او د ۶۴۷ کیلومتره په اوږدوالي د سمنګان، بغلان، بامیان، میدانوردګو او لوګر له ولایتونو په تېرېدو د پکتیا ډنډپټان ولسوالۍ ته رسېږي.</p>
<p style="text-align: justify;">د ریاستالوزراء اقتصادي معاونیت له لوري په خپره شوې خبرپاڼه کې راغلي، د اقتصادي کمېسیون په نوبتي غونډه کې چې د ریاستالوزراء اقتصادي مرستیال ملا عبدالغني برادر اخند په مشرۍ په مرمرینه ماڼۍ کې جوړه شوې وه، له اجنډا سره سم پر ټاکل شوو موضوعاتو بحث وشو.</p>
<p style="text-align: justify;">خبرپاڼه کاږي، دې غونډې ته د ډيپي ورلډ (DP World) شرکت د شرط پاڼې په تړاو متحده عربي اماراتو ته د اسلامي امارت د پلاوي کاري راپور، د کاسا زر پروژې په اړه د افغانستان برېښنا شرکت د ټاکل شوي پلاوي راپور، د افغان - ټرانس پروژې په تړاو د ټولګټو وزارت د اوسپنې پټلۍ معینیت راپور، د مناګي برېښنا بند په تړاو د افغانستان برېښنا شرکت راپور، د جواز سیر او لایسنس الکټرونیکي کولو طرحه او یو شمېر نور اقتصادي موضوعات وړاندې شول.</p>
<p style="text-align: justify;">د خبرپاڼې په حواله، له هر اړخیز بحث وروسته د افغان - ټرانس پروژې په تړاو د ټولګټو وزارت د اوسپنې پټلۍ معینیت راپور تایید او اړوندو وزارتونو او ادارو ته د لازمو کړنو ترسره کولو سپارښتنه وشوه.</p>
<p style="text-align: justify;">خو سرچینې د تایید شوي راپور په اړه نور جزئیات نه دي ورکړي.</p>
<p style="text-align: justify;">د یادونې ده، افغان - ټرانس یوه مهمه سیمهییزه طرحه ده چې موخه یې د افغانستان له لارې مرکزي او جنوبي اسیا هېوادونو ته د نړۍوالو سوداګریزو توکو لېږد رالېږد ته د اسانتیاوو برابرول دي.</p>
