د سالنګ لویه لار د لویو مسافروړونکو وسایطو پر مخ د مرغومي میاشتې تر څلورمې وتړل شوه

کابل (پژواک، ۲۰ لېندۍ ۱۴۰۳): د ټولګټو وزارت وايي چې د خلکو د ځان او مال ساتنې په موخه د سالنګونو لویه لار د ټولو لویو مسافروړونکو وسایطو لپاره د روان لمریز کال د مرغومي میاشتې تر څلورمې وتړل شوه.

د ټولګټو وزارت ویاند محمداشرف حق‌شناس تېره شپه پر خپله اېکس‌پاڼه لیکلي چې په تېرو څو ورځو کې په سالنګونو کې د واورې ورښت او توپان جریان لري او له بلې خوا د ياد مسير فرعي لاره د واورې او کنګل له امله د زیاتې ترافیکي ګڼې ګوڼې وړتیا نه لري.

سرچینې زیاته کړې، د خلکو د ځان او مال ساتنې او زړه‌بوږنونکو پېښو د مخنيوي په موخه د سالنګونو لویه لار د لویو مسافروړونکو وسایطو لکه ۲۰۲، ۳۰۳، ۵۸۰، مرسډیز، فلانکوچ، تونس، لوی نظامي وسایط او نورو هر ډول بار وړونکو وسایطو پر مخ د روان ۱۴۰۳ لمریز کال د مرغومي میاشتې تر څلورمې پورې وتړل شوه.

د حق‌شناس په خبره، کوچني تیزرفتاره مسافر وړونکي وسایط کولای شي د يادې لویې لارې پر فرعي مسير له دواړو لورو تګ راتګ وکړي.

د ټولګټو وزارت له خلکو او تیزرفتاره موټرو له چلوونکو غوښتي چې له يادې لویې لارې د تېرېدو پرمهال دې د وسایطو لپاره چین (ځنځیر)، ګرم ژمني توکي او تجهیزات له ځان سره ولري، ترافیکي قوانین دې مراعت کړي، له بشپړ احتیاطه دې کار واخلي او د سالنګونو د موظفینو لارښوونو ته دې جدي پاملرنه وکړي.