پلعلم (پژواک، ۲۴ لېندۍ ۱۴۰۳): د ریاستالوزراء اقتصادي مرستیال وايي چې د اوبو مدیریت دوی ته لومړیتوب لري او له ګاونډيو هېوادونو سره د اړتیا پر بنسټ سوداګریزو اړیکو ته پراختیا ورکول کېږي.
دغه څرګندونې د ریاستالوزراء اقتصادي مرستیال ملا عبدالغني برادر لوګر ته د یوه سفر په ترڅ کې د دغه ولایت له سیمهییزو چارواکو سره د لیدنې پرمهال وکړې.
په دغه لیدنه کې د لوګر والي مولوي ضیاالرحمن مدني له ملا برادر سره د دغه ولایت د اوسېدونکو د پوهنې، روغتیا، کرنې، اوبو مدیریت او نورو برخو ستونزې شریکې کړې دي.
نوموړي زیاته کړه، د تېرو څو لسیزو پرلهپسې جګړو د لوګر اوسېدونکي سخت زیانمن کړي او اړتیا ده چې ځانګړې پاملرنه ورته وشي.
دغه راز، د ریاستالوزراء اقتصادي مرستیال ملا عبدالغني برادر وویل، اسلامي امارت ټولو هېوادوالو ته له هر ډول توپیر پرته خدمات وړاندې کوي.
نوموړي همدارنګه زیاته کړه، د اوبو مدیریت حکومت ته لومړیتوب لري او په دې برخه کې په دې ورستیو کې ښې لاسته راوړنې هم لري.
برادر همدارنګه وویل، اسلامي امارت له ګاونديو هېوادونو سره ښې سوداګريزې اړیکې لري او هڅه کوي چې دغه اړیکو ته د اړتیا پر بنسټ پراختیا ورکړي.
د ریاستالوزراء اقتصادي مرستیال د لوګر له اوسېدونکو سره ژمنه وکړه چې ستونزو ته یې رسېدنه کوي.
