په کابل ښار کې د ځینو خوراکي توکو بیې ټیټې خو د نفتي توکو او سرو زرو بیې لوړې شوې دي

کابل (پژواک، ۲۴ لېندۍ ۱۴۰۳): نن د کابل ښار په بازارونو کې د بورې، وریجو او غوړیو بیې ټیټې خو د نفتي توکو او سرو زرو بیې بیا لوړې شوې دي.

کابل ښار کې د خوراکي توکو سوداګرو اتحادیې رییس زمري صافي پژواک خبري اژانس ته وویل، نن د تېرې شنبې په پرتله د ځینو خوراکي توکو بیې د هغو د وارداتو ډېرېدو له امله ټیټې شوې دي.

د هغه د معلوماتو له مخې:

• د ۴۹ کیلوګرامه هندي بورې بیه له ۲۵۵۰ څخه ۲۵۰۰ افغانیو ته
• د ۲۴ کیلوګرامه پاکستانۍ لومړۍ سېله وریجو بیه له ‎۲۶۵۰ څخه ۲۶۰۰ افغانیو ته
• او د ۱۶ لېټره مالیزیايي غوړیو بیه له ۱۸۵۰ څخه ۱۸۰۰ افغانیو ته ټیټې شوې دي.

خو د خوراکي توکو سوداګرو اتحادیې د رییس په وینا، د ځینو نورو توکو په عمده بیو کې بدلون نه دی راغلی.

• د ۴۹ کیلوګرامه قزاقي اوړو بیه ۱۴۵۰ افغانۍ
• د یو کیلوګرام افریقایي تور چای بیه ۴۰۰ افغانۍ
• او د یو کیلوګرام اندونیزیایي شین چای بیه ۳۵۰ افغانۍ ده.

د ځينو توکو پرچون او عمده بیې په یو شمېر مواردو کې لږ خو په ځینو کې بیا ډېر توپیر لري.

د کابل ښار په دهن‌باغ سیمه کې د خوراکي توکو یوه پرچون پلورونکي حامد صوفي‌زاده وویل، نن په پرچون ډول ۴۹ کیلوګرامه قزاقي اوړه په ۱۵۰۰ افغانۍ، ۲۴ کیلوګرامه لومړۍ سېله پاکستانۍ وریجې په ۲۶۵۰ افغانۍ، ۴۹ کیلوګرامه هندۍ بوره په ۲۵۵۰ افغانۍ، ۱۶ لېتره مالیزیايي غوړي په ۱۸۵۰ افغانۍ، یو کیلوګرام اندونیزیایي شین چای په ۴۰۰ افغانۍ او یو کیلوګرام افریقایي تور چای په ۴۵۰ افغانۍ پلورل کېږي.

د نفتي توکو بیې

د «احمدیار ګروپ» تېلو ټانک یوه کارکوونکي وویل چې د تېرې اونۍ په پرتله د نفتي توکو په بیو کې لږ توپیر راغلی دی.

د یوه لېتر پټرولو بیه له ۶۰ څخه ۶۱ افغانیو ته

او د یوه لېتر ډېزلو بیه له ۵۸ څخه ۵۹ افغانیو ته پورته شوې

دغه‌راز، د کابل ښار په کلوله‌پشته سیمه کې ګاز پلورونکی محمد‌شریف وایي، د تېرې شنبې په پرتله نن د یو کیلوګرام اوبلن ګاز بیه له ۵۰ څخه ۵۴ افغانیو ته لوړه شوې ده.

د پلورونکو په وینا، نړۍوال بازار کې د دغو توکو بیو لوړېدو له امله د کابل ښار په بازارونو کې هم د هغو بیې لوړې شوې دي.

د سرو زرو بیې

د کابل پر تیمورشاهي واټ د حاجي حامد صالح‌زاده زرګرۍ مالک محمدفواد وايي چې تېر شنبې په پرتله نن د سرو زرو بیې لوړې شوې دي.

• د‎ یو ګرام ۷۵۰ عیار عربي سرو زرو بیه له ۴۸۵۰ څخه ۴۹۰۰ افغانیو
• او د یو ګرام ٥٨٥ عیار روسي سرو زرو بیه له ۳۸۵۰ څخه ۳۹۰۰ افغانیو ته لوړه شوې

نوموړي زیاته کړه چې په کابل ښار کې د سرو زرو بیو بدلون په نړۍوالو بازارونو کې د هغو د بیو له بدلون سره تړاو لري.

د اسعارو بیې

د کابل ښار په شهزاده سرای کې د «صداقت» صرافۍ مالک حاجي محمدحسین پژواک خبري اژانس ته وویل چې نن د یوه امریکایي ډالر د پېر بیه ۷۰ افغانۍ ده او زر پاکستانۍ کلدارې په ۲۵۰ افغانیو بدلېږي.

دا په داسې حال کې ده چې د روان کال د لېندۍ میاشتې په ۱۷مه د یوه امریکايي ډالر د پېر بیه ۷۰ افغانۍ وه او زر پاکستانۍ کلدارې په ۲۴۵ افغانیو تبادله کېدې.