پروان کې د یوه ښوونکي د وژلو په تور دوه کسان ونیول شول

چاریکار (پژواک، ۸ مرغومی ۱۴۰۳): د پروان امنیه قومانداني د دغه ولایت په مرکز کې د یوه ښوونکي د وژلو په تور د دوو کسانو د نیول کېدو خبر ورکوي او وايي، له هغوی څخه وسلې هم ترلاسه شوې دي.

د پروان د امنیې قوماندانۍ ویاند عبدالرحیم مسکین‌یار پژواک خبري اژانس ته وویل: «تېره شپه ۹:۳۰ بجې د دغه ولایت د امنیه قوماندانۍ د شپږمې حوزې په توغبردي سیمه کې د دغې سیمه یو اوسېدونکی چې په یوه ښوونځي کې یې د ښوونکي په توګه دنده ترسره کوله، د ناپېژانده کسانو له لورې په ډزو وژل شوی و.»

هغه زیاته کړه، امنیتي ځواکونو د یادې پېښې په تړاو دوه کسان سره له دوه تفنګچو، دوه دستبندونو، درې د کلاشینکوف شاجورونو او دوه چاقوانو سره نیولي دي.

نوموړي څرګنده کړه چې د لومړیو څېړنو له مخې، د یادې پېښې لامل د ځمکې پر سر شخصي دښمني ښودل شوې ده.

د هغه په خبره، د موضوع لا روښانه کولو لپاره څېړنې روانې دي.