ترینکوټ (پژواک، ۱۱ مرغومی ۱۴۰۳): د اروزګان په چورې ولسوالۍ کې د دوو کورنیو ترمنځ ۳۰ کلنه دښمني چې د یوه کس د وژل کېدو له امله رامنځته شوې وه، نن د ځایي مسوولینو، قومي مشرانو او دیني عالمانو په منځګړيتوب پای ته ورسېده.
د اروزګان په چورې ولسوالۍ کې د دوو کورنیو ترمنځ ۳۰ کلنه دښمني تېره ورځ د یوې قومي جرګې په پایله کې حل و فصل شوه.
دغې قومي جرګې ته چې د سرحدونو، قومونو او قبایلو چارو وزارت د جرګو او قبایلي چارو د همغږۍ مرستیال محمد عليجان احمد، ځايي ولایتي مسوولین، دیني عالمان او قومي مشران راغلي وو، پرېکړه یې وکړه چې د یادو کورنیو ترمنځ دغه ۳۰ کلنه دښمني نور پای ته رسېدلې ده.
د هغوی د معلوماتو له مخې، یاده دښمني له یوې خپلمنځي شخړې وروسته چې یو کس هم په کې وژل شوی و، پیل شوې وه.
د قبایلو وزارت د جرګو او قبایلو چارو د همغږۍ مرستیال مولوي احمد له دواړو کورنیو مننه وکړه چې د جرګې پرېکړه ته یې درناوی وکړ او زیاته یې کړه چې اوسنی حالت د خپلمنځي دښمنیو د پای ته رسولو ښه فرصت دی.
هغه زیاته کړه: «د چورې په سرۍ سیمه کې د محمد او مولاداد د کورنیو ترمنځ یاده دښمني ۳۰ کاله مخکې رامنځته شوې وه چې نن پای ته ورسېده.»
نوموړي دغه راز وویل، د اسلامي امارت له راتګ سره د هېواد په ډېرو ولایتونو کې خپلمنځي دښمنۍ پای ته رسېدلې او دا لړۍ لا هم دوام لري.
ورته مهال، تازه پخلا شوو کورنیو له مسوولینو، دیني عالمانو او منځګړو مننه وکړه چې د دوی ترمنځ یې د خیر ښېګڼې هڅې وکړې.
د یادوني ده، څه موده مخکې هم دغه ولایت کې د ځایې مسوولینو او قومي مخورو په منځګړيتوب یوه څلوېښت کلنه دښمني پای ته ورسېده.
