<p style="text-align: justify;">مزارشریف (پژواک، ۲۰ مرغومی ۱۴۰۳): د بلخ په مرکز مزارشریف ښار کې د ۵۰ میلیونه ډالرو په پانګونې د نفتو د تصفیې یوه فابریکه جوړه او پرانیستل شوه.</p>
<p style="text-align: justify;">د دغې فابریکې رییس سهراب صمدي وایي چې یاده فابریکه د ۵۰ میلیون ډالرو په پانګونې پر ۵۰ زره متر مربع ځمکه د اوو میاشتو په موده کې جوړه او نن پرانیستل شوه.</p>
<p style="text-align: justify;">صمدي زیاتوي، چې دغه فابریکه ۲۴ ساعتونو کې د ۶۰۰ ټنه نفتو او په میاشت کې د ۱۸ زره ټنه نفتو د تصفیې ظرفیت لري چې دا مهال په کې شاوخوا ۱۰۰ کسانو ته د کار کولو فرصت برابر شوی دی.</p>
<p style="text-align: justify;">په همدې حال، د بلخ ولایت د صنعت او سوداګرۍ رییس امیرمحمد متقي د دغه ډول فابریکو جوړول د هېواد اقتصادي ودې، کارموندنې او د خلکو ژوند د کیفیت ښه کولو برخو کې مهم بولي او وایي چې حکومت د کورنیو تولیداتو معیاري کېدو لپاره هڅې کوي.</p>
<p style="text-align: justify;">هغه زیاتوي چې اسلامي امارت د سوداګرو او صنعتکارانو د حقونو خوندیتوب، ستونزو او خنډونو لرې کولو لپاره ژمن دی او هڅه کوي څو د پانګونې لپاره لا ډېر فرصتونه برابر کړي.</p>
<p style="text-align: justify;">ورته مهال د سرپرست حکومت د چارو ادارې د پانګونې اسانتیاوو رییس احمدضیا د دې فابریکې د پرانیستې پر مهال وویل: «اسلامي امارت تل د سوداګرو د ملاتړ لپاره هڅه کړې، اوسمهال، په ټول هیواد کې شاوخوا ۲۰۰ زره جریب ځمکه صنعتي پارکونو او له ډلې یې ۲۰ زره جریب ځمکه بلخ کې ځانګړې شوې ده.»</p>
<p style="text-align: justify;">بلخوا، د افغانستان د صنایعو او کانونو خونې مرستیال محمدطاهر روشنزاده پانګوالو ته د اسانتیاوو پر برابرولو ټینګار وکړ او ویې ویل: «نوې جوړې شوې فابریکې او شرکتونه همکارۍ ته اړتیا لري، او حکومت باید لږ تر لږه درې کاله د مالیې کمولو په برخه کې له پانګوالو سره همکاري وکړي.»</p>
<p style="text-align: justify;">بلخ ولایت کې د نفتو تصفیې دغه فابریکه په داسې حال کې پرانیستل کېږي چې تر دې دمخه په دغه ولایت کې نهه نورې د نفتو د تصفیې فابریکې فعالیت لري.</p>
