<p style="text-align: justify;">کابل (پژواک، ۲۲ مرغومی ۱۴۰۳): د کابل ښاروالي وايي چې د پغمان ولسوالۍ پخواني سړک د جوړولو او پراختیا لومړنۍ چارې د ۱۱۷ میلیون افغانیو په لګښت پیل شوې.</p>
<p style="text-align: justify;">د کابل ښاروالۍ نن پر خپله <strong><a href="https://x.com/KblMunicipality/status/1877966539519037528">اېکس</a> </strong>پاڼه لیکلي چې د ودانیزو چارو د مرستیال انجنیر عامر زمرک یاسر په حضور کې د ۱۱۷ میلیون افغانیو په لګښت د پغمان پخواني سړک د جوړولو او پراختیا لومړنۍ چارې پیل شوي.</p>
<p style="text-align: justify;">د ودانیزو چارو مرستیال ویلي، کابل ښار کې د ترافیکي او ترانسپورټي زېربناوو د پراختیا په موخه د یاد سړک یوه لیکه له قرغې بند سیمې تر طاق ظفر پورې د ۹۱۵۳ مترو په اوږدوالي او د اووه مترو په سور سره د کابل ښاروالۍ د کار، ساتنې او مراقبت ریاست له لوري جوړېږي.</p>
<p style="text-align: justify;">د هغه د معلوماتو له مخې، د دغه سړک د جوړولو چارې به د ۱۱ میاشتو په موده کې بشپړې شي.</p>
<p style="text-align: justify;">د سرچینې د معلوماتو له مخې، د دغه سړک په جوړېدو سره به د پغمان تفریحي سیمې ته د تلونکو خلکو او د څوارلسمې ناحیې اوسېدونکو ته د تګ راتګ برخه کې اسانتیاوې برابرې شي.</p>
