<p style="text-align: justify;">کابل(پژواک، ۲۴ مرغومی ۱۴۰۳): د احصایې او معلوماتو ملي اداره وايي چې هېواد کې د الکترونیکي پېژندپاڼو د وېش له پيل راهیسې تراوسه څه باندې ۱۵ میلیون کسانو ته الکترونیکي پېژندپاڼې وېشل شوې دي.</p>
<p style="text-align: justify;">یادې ادارې نن (دوشنبه، د مرغومي ۲۴مه) د یوې خبرپاڼې په خپرولو سره ویلي چې یادې ادارې د الکترونیکي پېژندپاڼو د وېش لړۍ له پیل راهیسې ۱۵ میلیون او څه باندې ۱۸ زرو کسانو ته الکترونیکي پېژندپانې وېشلې چې ۹ میلیون او ۶۷ زره یې نارینه او ۵ میلیونه او ۹۵۲ زره یې ښځینه دي.</p>
<p style="text-align: justify;">سرچینه وايي، په وېشل شوو الکترونیکي پېژندپاڼو کې تر ټولو ډېرې په کابل کې ۶ میلیونه او ۲۲۵ زره، په هرات کې یو میلیون او څه باندې ۶ زره، ننګرهار کې ۷۶۵ زره او ۲۵۶، بلخ کې څه باندې ۶۷۸ زره او په کندهار کې نږدې ۵۲۶ زره پېژندپاڼې وېشل شوې دي.</p>
<p style="text-align: justify;">سرچینې لیکلي، دا په داسې حال کې ده چې د ټولو وېشل شوو الکترونیکي پېژندپاڼو له ډلې یوازې د ا.ا.ا له بیا واکمنېدو تراوسه په ټول هېواد کې نږدې ۹ میلیونه الکترونیکي پېژندپاڼې وېشل شوې دي.</p>
<p style="text-align: justify;">د سرچینې له قوله، اوسمهال په ټول هېواد کې د الکترونیکي پېژندپاڼې او آسان خدمت ۷۳ وېش څانګې او یو ګرځنده ټیم او دغه راز په متحده عربي اماراتو کې د آسان خدمت یو مرکز فعال دی چې هره ورځ ښځینه او نارینه غوښتونکو ته اړوند خدمتونه وړاندې کوي.</p>
