<p style="text-align: justify;">کابل (پژواک، ۲۴ مرغومی ۱۴۰۳): د افغانستان د بهرنیو چارو وزارت سیاسي مرستیال کابل کې د ایران له سفیر سره په لیدنه کې هیله څرګنده کړې چې دغه هېواد ته د افغانانو د تګ راتګ او هلته د کډوالو د ستونزو حل برخه کې لازمې اسانتیاوې برابرې شي.</p>
<p style="text-align: justify;">د افغانستان د بهرنیو چارو وزارت پر خپله اېکسپاڼه لیکلي چې د یاد وزارت سیاسي مرستیال شېرمحمد عباس ستانکزي کابل کې د ایران له سفير علي رضا بیګدلي سره تعارفي ناسته کړې ده.</p>
<p style="text-align: justify;">سرچینې لیکلي، ستانکزي ویلي چې د بیګدلي د ماموریت په لړ کې به د افغانستان او ايران سیاسي، اقتصادي او فرهنګي اړیکې لا پیاوړې شي.</p>
<p style="text-align: justify;">د سرچینې په حواله، د بهرنیو چارو وزارت سیاسي مرستیال په ایران کې د افغان کډوالو پر ستونزو خبرې وکړې او هیله یې څرګنده کړه چې ایران ته د افغانانو د تګ راتګ او هلته د کډوالو د ستونزو حل په لړ کې لازمې اسانتیاوې برابرې شي.</p>
<p style="text-align: justify;">دا په داسې حال کې ده چې په دې وروستیو کې ایران کې د پولیسو له لوري د افغان کډوالو نیول، ځورول او شړل زیات شوي او دا لړۍ دوام لري.</p>
<p style="text-align: justify;">د سرچینې د معلوماتو له مخې، کابل کې د ایران سفیر څرګنده کړه چې له افغانستان سره به یې د هېواد سیاسي، اقتصادي او فرهنګي اړیکې لا پراخه شي او له شته فرصتونو یې د دوه اړخیزو اړیکو د پالنې پر دوام او پراختیا ټینګار وکړ.</p>
