<p style="text-align: justify;">هرات (پژواک، ۲۷ مرغومی ۱۴۰۳): هرات کې مسوولین وايي چې په دغه ولایت کې د تولیدېدونکو محصولاتو صادرات کورنیو او نړۍوالو بازارونو ته ډېر شوي او تازه د هرات صنعتي ښارګوټي کې د تولید شوې مربا صادرات امریکا، کاناډا او قزاقستان ته پیل شوي دي.</p>
<p style="text-align: justify;">هرات کې د درملپلورونکو اتحادیې رییس او د صنعت او کانونو ریاست د مدیره پلاوي غړي محمدناصر امین له پژواک خبري اژانس سره خبرو کې وویل، دا مهال په دغه ولایت کې ۱۱۶۰ لویې او کوچنۍ فابریکې فعالیت لري او بېلابېل توکي تولیدوي.</p>
<p style="text-align: justify;">هغه زیاته کړه چې په هرات کې د دغو کارخونو تولید شوي محصولات د هېواد د ولایتونو ترڅنګ بهرنیو هېوادونو ته هم صادریږي.</p>
<p style="text-align: justify;">د «ګلستان ارغوان» صنعتي شرکت رییس محمدوحید وايي، دوی د ورځې تر ۲۰ ټنه ګازرې له بزګرانو پېري او مربا ترې جوړوي، د کال په ټولو فصلونو کې د الوبالو، ګازرو، انځر او بهي مربا تولیدوي.</p>
<p style="text-align: justify;">هغه وویل چې په دغه ولایت کې د هر فصل مېوه د راټولولو پر مهال له بزګرانو پېري او په یخچالونو یې ږدي، څو د بېلابېلو توکو په تولید کې ترې استفاده وکړي.</p>
<p style="text-align: justify;">هغه زیاته کړه: «له دې مخکې زموږ د محصولاتو، په ځانکړې توګه د مربا صادرات، د نورو شرکتونو له لارې کېدل، خو په دې وروستیو کې موږ خپله امریکا، کاناډا او قزاقستان ته د مربا صادرات پیل کړل؛ دغه بهیر د مناسب بازار، لوړې تقاضا او دغه راز زموږ د تولید ظرفیت ته په کتو غوړېدلی دی.»</p>
<p style="text-align: justify;">بلخوا، په دې کارخونه کې یوازې د مربا جوړولو برخه کې ۸۰ کسان په مستقیم ډول کار کوي او خوښ دي چې د کار زمینه ورته برابره شوې ده.</p>
<p style="text-align: justify;">هغوی وايي، له کورنیو تولیداتو ملاتړ د نورو تولیدي شرکتونو ودې او د کاري فرصتونو رامنځته کولو ته لاره هواروي.</p>
<p style="text-align: justify;">دغه راز، د هرات د صنعت او سوداګرۍ رییس مولوي بشیرامحمد سیرت د تولیدي شرکتونو له هڅو او بهرنیو هېوادونو ته د مربا له صادراتو هرکلی کوي او وايي، اسلامي امارت د صنعت سکټور برخه کې د ستونزو له منځه وړلو ترڅنګ له کورنیو تولیداتو د ملاتړ لپاره هم ډېرې هلې ځلې کړې دي.</p>
<p style="text-align: justify;">د هغه په وینا، دمګړۍ د کورنیو تولیدي کارخونو وړتیا او ظرفیت ته په کتو، په هېواد کې د تولید شوو محصولات صادرات بهرنیو بازارونو ته ډېر شوي او حکومت هم د صادراتو برخه کې د اسانتیاوو رامنځته کولو لپاره هڅه کوي.</p>
<p style="text-align: justify;">د یادولو ده، له دې مخکې د هرات په صنعتي ښارګوټي کې تولید شوي بېلابېل مشروبات، خوراکي توکي او نور هم بهرنیو هېوادونو ته صادر شوي دي.</p>
<p style="text-align: justify;"></p>
