<p style="text-align: justify;">مهترلام (پژواک، د سلواغې لومړۍ نېټه ۱۴۰۳): لغمان کې سیمهییز مسوولین وایي، د دغه ولایت په قرغیو ولسوالۍ کې یې د اوبو د ۱۹ ذخېرو او پایپسکیم د جوړېدو چارې پیل کړې چې په درېیو میاشتو کې به بشپړې شي.</p>
<p style="text-align: justify;">د لغمان ولایت د سیندیزې حوزې رییس مولوي شیرجان راشیدي پژواک خبري اژانس ته وویل، د خوړو نړۍوال پروګرام په مالي ملاتړ یې د ۴۹ میلیون افغانیو په لګښت د قرغیو ولسوالۍ اړوند د ګلغونډۍ، «عبدالوکیل خان بڼ» او «وړې ګلې» سیمو کې د اوبو د ۱۹ بابه ذخېرو او پایپسکیم جوړولو چارې پیل کړې دي.</p>
<p style="text-align: justify;">هغه وویل: «یادې ذخېرې د ۹۶۰ متره مکعبه اوبو د ساتولو وړتیا لري چې په جوړېدو سره به یې ۱۷۱۰ کورنیو ته په مستقیمه توګه د څښاک د پاکو اوبو اسانتیاوې برابرې شي او هممهاله به ورسره ۱۶۰ هکتاره کرنیزه ځمکه هم خړوبه شي.»</p>
<p style="text-align: justify;">ورته مهال، د یادو سیمو اوسېدونکي د یادو پروژو په پلېکېدو خوښ دي او زیاتوي چې په دې سره به د څښاک د پاکو اوبو ستونزې حل شي.</p>
<p style="text-align: justify;">د قرغیو ولسوالۍ اړوند د عبدالوکیل خان بڼ سیمې اوسېدونکي او قومي مشر ملک غیرت وویل، دوی په ډېرو ستونزو له کابل سینده په بوشکو کې د څښاک لپاره اوبه راوړي خو وروسته له دې به د یادو ذخیرو په جوړېدو سره په اسانۍ پاکو اوبو ته لاسرسی ولري.</p>
<p style="text-align: justify;">بلخوا، د ګلغونډۍ سیمې اوسېدونکي ملک کامران وویل، د دوی په سیمه کې د پایپ سکیم پروژه پلې کېږي چې ورسره به سلکونه کورنیو ته پاکو اوبو ته د لاسرسي زمینه برابره شي.</p>
<p style="text-align: justify;">د مسوولینو په خبره، د یادې پروژې چارې به د درېیو میاشتو په موده کې بشپړې او لسګونه کسانو ته به پهکې د کار زمینه برابره شي.</p>
