Language

Don't you have an account with Pajhwok Afghan News?

Click here to subscribe.

د افغانستان او چین ترمنځ د ډیپلوماټیکو اړیکو اویایمه کالیزه ونمانځل شوه

کابل (پژواک، د سلواغې لومړۍ نېټه ۱۴۰۳): د بهرنیو چارو وزارت سیاسي مرستیال د افغانستان او چین ترمنځ د ډیپلوماټیکو اړيکو د اویایمې کالیزې په نمانځ‌غونډه کې وویل، دواړو هېوادونو د تاریخ په اوږدو کې ښه ګاونډیټوب کړی او چین دې په سیمه‌ییزو او نړۍوالو غونډو کې د افغانستان له دریځه ملاتړ وکړي.

په کابل کې د چين سفیر وویل چې هېواد یې په ملګرو ملتونو او نورو څو اړخیزو ناستو کې د افغانستان له دریځه ملاتړ کړی او پر دغه هېواد د لګول شوو غیرعادلانه بندیزونو د لرې کېدو او د افغانستان د شتمنیو ازادېدو غوښتنه یې کړې ده.

د افغانستان او چین ترمنځ د ډيپلوماټيکو اړیکو د ۷۰مې کالیزې نمانځ‌غونډه نن د افغانستان د بهرنیو چارو وزارت له لورې جوړه شوې وه.

د بهرنیو چارو وزارت سیاسي مرستیال، شېرمحمد عباس ستانکزی په یاده غونډه کې وویل، چین د افغانستان یوازینی ګاونډی دی چې د تاریخ په اوږدو کې یې ورسره پر ګډه پوله ستونزه نه درلوده او دا یې د ښه ګاونډيتوب لویه نښه ده.

ستانکزي وویل، افغانستان د چین د خلکو انقلاب په داسې وخت کې په رسمیت وپېژاند چې ښایي کمو دولتونو به په رسیمت پېژندلی و او په همدې اساس افغانستان له هغو لومړنیو دولتونو څخه و چې په ۱۹۵۵ میلادي کال کې یې خپل سفیر چین ته ولېږه او چین کابل کې خپل سفارت پرانیست.

ده وویل: «د افغانستان اسلامي امارت موسس امیرالمومنین مرحوم ملا محمد عمر مجاهد،  په خپل وخت کې د چین استازو ته ډاډ ورکړی و چې د افغانستان خاوره به هېڅکله د چین او یا بل ګاونډي په ضد نه استعمالېږي، موږ اوس هم په خپله ژمنه ولاړ یو او له دغه سټیجه خپلو ټولو ګاونډیو هېوادونو ته ډاډ ورکوو چې د افغانستان خاوره به هېڅکله د دوی په ضد استعمال نه شي.»

د ده په خبره، هغه وخت چې افغانستان د لرغوني وخت د اسیا څلورلارې بلل کېده، واخان دره د تمدونونو د تقاطع نقطه ګڼل کېده، د ورېښمو له دې لارې همدغه لومړنیو تجارتي او کلتوري اړیکو افغانستان او چین د دیپلوماتیکو اړیکو په تار وپیېل.

ستانکزي زیاته کړې، افغانستان د هر ډول راکړې ورکړې لپاره فرصتونه لري او چین باید ترې استفاده وکړي.

دی وایي، اوس هم د چین حکومت په افغانستان کې ډېره پانګونه کړې ده چې د مس عینک او د هېواد په شمال کې د نفتو استخراج او تصفیه یې ښې بېلګې دي.

د بهرنیو چارو وزارت سیاسي مرستیال وویل، د اسلامي امارت په حاکمیت سره د چین او افغانستان اړیکې لا وغوړېدې.

ده له چین څخه وغوښتل چې په سیمه‌ییزو او نړۍوالو غونډو کې د افغانستان له دریځه ملاتړ وکړي.

په کابل کې د چین سفیر ژاو‌شینګ هم په دغه غونډه کې وویل چې چین د افغانانو مذهبي باورونو او دودونو ته درناوی لري او د افغانستان په کورنیو چارو کې لاس‌وهنه نه کوي.

هغه زیاته کړه، چين په ملګرو ملتونو او نورو څو اړخیزو ناستو کې د افغانستان له دریځه ملاتړ کړی او پر دغه هېواد د لګول شوو غیرعادلانه بندیزونو د لرې کېدو او د افغانستان د شتمنیو ازادېدو غوښتنه یې کړې ده.

ژاو شینګ دغه‌راز وویل، چین د افغانستان په اقتصادي او ټولنیزه بیارغونه کې مهمه ونډه اخیستې ده.

GET IN TOUCH

SUGGEST A STORY

پژواک ستاسو د خبر له وړانديزونو خوښ دی؛ مهرباني وکړئ، دلته په کلېک کولو سره له موږ سره خپل نظر شریک کړئ

PAJHWOK MOBILE APP

د وروستي تازه معلوماتو ترلاسه کولو لپاره په خپل ګرځنده موبایل کې زموږ اپلېکشن ډاونلوډ کړئ.