غزني کې د زرګونو کسانو د سترګو وړیا درملنه وشوه

غزني‌ښار (پژواک، ۲ سلواغه ۱۴۰۳): غزني ولایت ته د عامې روغتیا وزارت له لوري د ډاکټرانو استول شوې ډلې د شاوخوا ۳۷۰۰ کسانو د سترګو وړیا درملنه کړې ده.

د غزني ولایت د عامې روغتیا رییس ډاکټر محمد زرک ځیرک پژواک خبري اژانس ته وویل چې د زون په کچه د غزني په حوزوي روغتون کې د سترګو ناروغانو لپاره وړیا درملنه ترسره شوه چې ۱۲ ورځې یې دوام وکړ.

نوموړي وویل، په یاده موده کې ۲۳۰ د سترګو عملیاتونه او د شاوخوا ۳۵۰۰ کسانو د سترګو بېلابېلو ناروغیو درملنه شوې.

هغه زیاته کړه چې یادو کسانو ته درمل، عینکې او مشورې هم په وړیا ډول ورکول شوې دي.

دی وايي چې یادې لس‌کسیزې ډلې هره ورځ د سترګو شاوخوا ۳۰۰ ناروغان معاینه کول او د هغوی درملنه یې کوله.

ورته مهال، د غزني یو شمېر اوسېدونکي د عامې روغتیا وزارت د دغه ګام هرکلی کوي.

د غزني یوه اوسېدونکي شریف‌الله پژواک ته وویل: «څو ورځې مخکې مې نوملیکنه وکړه، زه دلته د سترګو د تداوي په خاطر راغلم، خو یوازې درمل یې راکړل، زما غوښتنه ده چې عامي روغتیا وزارت دې دغه ولایت ته ورته نورې روغتیایي ډلې هم راواستوي، څو د غریبو او بې‌وسو خلکو درملنه وکړي.»

دا په داسې حال کې ده چې تېر کال هم د عامي روغتیا وزارت روغتیایي ډلې په غزني کې د سلګونو کسانو د سترګو وړیا درملنه کړې وه.