کونړ کې د څه باندې سل میلیون افغانیو په لګښت پنځو روغتیایي مرکزونو ته ودانۍ جوړې شوې دي

اسعداباد (پژواک، ۷ سلواغه ۱۴۰۳): د کونړ د عامې روغتیا ریاست مسوولین وایي چې په تېرو درېیو کلونو کې یې د دغه ولایت په بېلابېلو ولسوالیو کې د ۱۰۳ میلیون افغانیو په لګښت پنځو روغتیایي مرکزونو ته نوې معیاري ودانۍ جوړې کړې دي.

د کونړ د عامې روغتیا رییس قاري مظفر مخلص پژواک خبري اژانس ته وویل، د یو شمېر نړۍوالو مرستندویه ادارو په همکاري یې هڅې پېل کړې چې د دغه ولایت په ټولو هغو سیمو کې چې روغتیایي مرکزونه یې ودانۍ نه‌لري، نوې او عصري ودانۍ ورته جوړې کړي.

هغه زیاته کړه: «موږ په تېرو درېیو کلونو کې د کونړ په څلورو ولسوالیو سرکاڼو، ماڼوګي، شلتن او شیګل کې پنځو روغتیایي مرکزونو لپاره ودانۍ جوړې کړې او ګټې اخیستنې ته سپارل شوې چې د یو شمېر نادولتي ادارو په مالي همکارۍ ۱۰۳ میلیون افغانۍ لګښت ورباندې راغلی دی.»

نوموړی زیاتوي، په دې موده کې یې په ۳۴ روغتیایي مرکزونو کې د ناروغانو د پایوازانو لپاره د ناستې ځای او د واکسینونو ځانګړې خونې هم جوړ کړي دي.

د عامې روغتیا د رییس په خبره، یاد شمېر روغتیایي مرکزونو لپاره د نوو ودانیو په جوړېدو سره لسګونه زره خلکو ته د روغتیا برخه کې اسانتیاوې رامنځته شوې دي.

هغه زیاتوي، اوسمهال د ځینو نورو روغتیایي مرکزونو لپاره هم د ودانیو جوړولو چارې دوام لري چې ۳۰ میلیونه افغانۍ لګښت یې کېږي او په نږدې راتلونکي کې به ګټې اخیستنې ته وسپارل شي.

ورته مهال، د دغه ولایت اوسېدونکي د روغتیایي مرکزونو لپاره د نوو ودانیو پر جوړېدو خوښ دي او له حکومت او مرستندویه ادارو غواړي چې لرو پرتو سیمو ستونزو ته لا ډېره پاملرنه وکړي.

د شیګل ولسوالي د موڼي کلي اوسېدونکي حاجي عبدالرحیم وویل، په سیمه کې یې شته روغتیایي مرکز لا هم ودانۍ نه ‌لري او په یوه کرایي کور کې فعالیت کوي.

هغه زیاته کړه: «زموږ کلینیک وداني نه ‌لري، په یوه کرایي کور کې خدمات وړاندې کوي، د ناروغانو او د پایوازانو لپاره د ناستې مناسب ځای هم نه‌ لري، یو خټین کور دی چې د ورښتونو پر مهال په‌کې ډاکټران او ناروغان له ستونزو سره مخ وي.»

دغه راز د سرکاڼو ولسوالۍ د څپري سیمې اوسېدونکي امان‌الله وویل، حکومت او مرستندویه ادارې دې د کونړ په ټولو هغو سیمو کې چې روغتیایي مرکزونه یې ودانۍ نه ‌لري او یا یي هم خلک روغتیایي اسانتیاوو ته لاسرسی نه‌ لري، نوي روغتیايي مرکزونه ورته جوړ کړي.

کونړ د هېواد په ختیځ کې یو غرنی ولایت دی چې ګڼ شمېر ولسوالۍ  یې له مرکز اسعداباد سره لسګونه کيلومتره فاصله لري او خلک یې د روغتیا، پوهنې، کرنې، مخابراتو او لویو لارو برخو کې له ستونزو سره مخ دي.