کابل (پژواک، ۹ سلواغه ۱۴۰۳): د سرحدونو، قومونو او قبایلو چارو وزارت سرپرست کابل کې په یوه غونډه کې وویل چې افغانستان ته اختلافات له پردي فکر، عقیدې او سیاسته راغلي او په وینا یې، وحدت ته بلنه د یوه نظام لپاره فریضه ده.
د سرحدونو، قومونو او قبایلو چارو وزارت سرپرست ملا نورالله نوري یادې څرګندونې د دغه وزارت له لوري د کابل ولایت او اړوند ولسوالیو د دیني عالمانو، قومي مشرانو، مخورو او ځوانانو په ګډون د «اسلامي نظام ثبات، د ولسونو یووالي او انسجام» ترسرلیک لاندې جوړه شوې غونډه کې وکړې.
یاده غونډه کې نن د کابل ښار په یوه خصوصي هوټل کې جوړه شوې وه.
د یاد وزارت سرپرست په دغه غونډه کې وویل چې افغانستان ته اختلافات له پردي فکر،عقیدې او سیاسته راغلي دي.
دی وایي، پر وحدت باندې امر یا وحدت ته بلنه هم د یوه نظام لپاره فریضه ده او هم د مسلمانانو ترمنځ ضروري امر دی.
هغه زیاته کړه، د اسلامي امارت سیاست د قران او نبوي احادیثو په رڼا کې سیاست ده.
نوموړي دا هم وویل چې امریکا په افغانستان کې ماته خوړلې؛ ځکه اوس اسلامي امارت په رسمیت نه پېژني.
نوري دغهراز وویل چې له نړۍ تمه ده څو اسلامي امارت په رسمیت وپېژني.
د سرحدونو، قومونو او قبایلو چارو وزارت د جرګو او قبایلي چارو د همغږۍ مرستیال مولوي محمدعلي جان یاده غونډه کې وویل، د نننۍ غونډې موخه د کابل ولایت په کچه د خلکو ستونزو اورېدل او ورته د حل لارو موندل دي.
دی وايي، اسلامي امارت له هېچا سره تبعیض نه لري او نه له چا سره تعصب پالي.
هغه زیاته کړ، اسلامي امارت له بهرمېشتو افغان سیاسیونو سره هېڅ ستونزه نه لري او له عمومي عفوې دې ګټه واخلي، هېواد ته دې راستانه شي او د هېواد په ابادۍ کې دې برخه واخلي.
هغه د افغانستان ولسونو ترمنځ پر یووالي او د خپلمنځي اختلافاتو په له منځه وړلو ټینګار وکړ.
د کابل ولایت والي ملا امینالله عبید په دغه غونډه کې وویل، د افغان ولس د یووالي په پایله کې په ټول هېواد کې بشپړ امنیت ټینګ شوی دی.
دی وايي، اسلامي امارت د روان ۱۴۰۳ لمریز کال په اوږدو کې د ۱۱ میلیارد افغانیو په لګښت په بېلابېلو پرمختیایي پروژو کار کړی دی.
هغه زیاته کړه، د کابل ښاروالۍ له لوري دا مهال په ښار کې د ۶،۴ میلیارد افغانیو په لګښت پر یو شمېر پرمختیایي پروژو تطبیق باندې کار روان دی.
هغه له خلکو وغوښتل چې له اسلامي امارت سره اوږه په اوږه ودرېږي څو ستونزې یې حل شي.
بل لور ته د یادې غونډې ګډونوالو وویل چې د اسلامي امارت ترڅنګ ولاړ دي او خپل ملاتړ له اوسني حکومت څخه اعلانوي.
