تېره میاشت د اوسپنې پټلۍ له لارې نږدې ۴۰۹ زره مټریک ټنه انتقالات شوي

کابل (پژواک، ۱۴ سلواغه ۱۴۰۳): د ټولګټو وزارت په تېره یوه میاشت کې د افغانستان د څلورو بندرونو د اوسپنې پټلیو له لارې د ۴۰۸ زره او ۸۷۶ مټریک ټنه توکو د انتقالاتو خبر ورکوي.

د یاد وزارت ویاند محمداشرف حق‌شناس نن پر خپله اېکس‌پاڼه لیکلي چې یاده اندازه انتقالات د روان ۱۴۰۳ لمریز کال په تېره مرغومي میاشت کې شوي دي.

هغه زیاته کړې، په یاده موده کې د حیرتان بندر له لارې ۳۰۲ زره او ۳۲۷ ټنه، د اقینې بندر له لارې ۲۷ زره او ۴۵ ټنه، د تورغونډۍ بندر له لارې ۷۰ زره او ۵۶۴ ټنه او د خواف – هرات له لارې ۸۹۴۰ ټنه انتقالات شوي چې ټول ۴۰۸ زره او ۸۷۶ مټریک ټنه کېږي.

سرچینه زیاتوي، په انتقالاتو کې نفتي او نور توکي شامل دي.

د سرچینې په حواله، د انتقالاتو له ډلې ۱۶۹۸ ټنه ترانزیټي او صادراتي توکي دي.

خو سرچینې د توکو نومونه نه دي اخیستي.

سرچینه کاږي، ټولګټو وزارت هڅه کوي څو د لا ډېرو انتقالاتو لپاره مناسب شرایط او سوداګرو ته سهولتونه برابر کړي.

د یاد وزارت د معلوماتو له مخې، د روان ۱۴۰۳ لمریز کال په تېره لېندۍ میاشت کې د افغانستان د څلورو بندرونو د اوسپنې پټلیو له لارې ۴۵۲ زره او ۱۳۲ مټریک ټنه انتقالات شوي وو.