<p style="text-align: justify;">مهترلام (پژواک، ۱۵ سلواغه ۱۴۰۳): د لغمان سیمهییز مسوولین وایي چې د دغه ولایت په مرکز او دوو ولسوالیو کې له کډوالۍ تازه راستنو شوو ۲۱۱ کورنیو ته د دایمي استوګنې په موخه جوړ شوي کورونه وسپارل شول.</p>
<p style="text-align: justify;">د لغمان د کډوالو او راستنېدونکو چارو رییس مولوي غلامالرحمن بلال پژواک خبري اژانس ته وویل، د مرکز مهترلام په ګډون په الینګار او قرغیو ولسوالیو کې یې د ملګرو ملتونو د کډوالو عالي کمېشنرۍ (UNCHR) په مالي ملاتړ د ۵۹ میلیون افغانیو په لګښت بېرته راستنو شوو ۲۱۱ کورنیو ته د دایمې استوګنې په موخه جوړ کړي کورونه وسپارل.</p>
<p style="text-align: justify;">هغه وویل، بېرته راستنو شوو ته سپارل شوي یاد کورونه هر یو دوه خونې، یو دهلېز، یو پخلنځی او یو تشناب لري چې په پاخه او اساسي ډول جوړ شوي دي.</p>
<p style="text-align: justify;">ورته مهال، هغه کسان چې دغه کورونه ورته ورکول شوي، خوشاله دي او له حکومت د لا ډېرې همکارۍ غوښتنه کوي.</p>
<p style="text-align: justify;">د مهترلام ښار اړوند د ګلارام سیمې اوسېدونکي عليخان وویل، له کوزې پښتونخوا په زور راشړل شوی او اوس خوشاله دی چې په وطن کې ورته د اوسېدو لپاره سرپناه جوړه شوه.</p>
<p style="text-align: justify;">د یادونې ده، د ۲۰۲۳ کال په وروستیو کې له کوزې پښتونخوا او د پاکستان له بېلابېلو ښارونو لسګونه زره افغان کورنۍ په زور را وایستل شوې چې یو شمېر یې لا هم دایمي سرپناه نه لري او په لنډمهالو پنډغالو کې ژوند کوي.</p>
