کابل (پژواک، ۲۰ سلواغه ۱۴۰۳): د افغانستان ملي دفاع وزارت، د ازبکستان له لوري امریکا ته د اوو چورلکو د سپارلو په اړه خپرو شوو راپورونو په غبرګون کې ویلي، دغه چورلکې د افغانانو حق دی، امریکا یې دې افغانستان ته د رالېږدولو برخه کې خنډونه نه جوړوي.
د افغانستان ملي دفاع وزارت له ازبکستانه امریکا ته د افغانستان د هلیکوپترو د لېږد په اړه وايي چې دا کار ورته د منلو نه دی، دا الوتکې د افغانستان ملکیت دی، افغانان حق لري چې د خپل حق غوښتنه او پوښتنه وکړي او له ګاونډي هېوادونه هم باید د افغانانو حق ته درناوی ولري.
د راپورونو له مخې، د ۱۴۰۰ لمریز کال په زمري میاشت کې د مخکني حکومت د ړنګېدو پرمهال له څلوېښتو ډېرې الوتکې او چورلکې ازبکستان او تاجکستان ته لېږدول شوې وې.
دوه ورځې مخکې ازبکستاني رسنیو خبر ورکړ چې د یادو چورلکو له ډلې، اووه بلکهاک چورلکې بېرته امریکا ته سپارل شوې دي.
د افغانستان د ملي دفاع وزارت پر خپله اېکسپاڼه لیکلي چې دا چورلکې د افغانستان ملکیت دی او د افغانستان د مخکینۍ ادارې لخوا ازبکستان ته د وتلو پرمهال لېږدول شوې دي، باید بیرته افغانستان ته راولېږدول شي.
په خبرپاڼه کې راغلي: «راپورونه خپاره شول چې د هغو الوتکو له جملې څخه چې له افغانستان څخه د تیرې ادارې د سقوط په مهال ازبکستان هېواد ته انتقال شوې وي، اووه هلیکوپترې امریکا ته انتقال شوې دي، اسلامي امارت په دې اړوند انديښمن دی، څرنګه چې دا الوتکې د افغانستان ملکیت دي، او د افغانستان د تیرې ادارې لخوا ازبکستان ته د تیښتې په مهال انتقال شوي دي، باید بیرته افغانستان ته را انتقال کړل شي.»
یاد وزارت لیکلي: «دا چې یادې چورلکې د هر دلیل له مخې امریکا ته انتقالیږي، موږ ته داسې کول د منلو نه دي؛ ځکه افغانان حق لري چې د خپل حق غوښتنه او پوښتنه وکړي او هسمایه هیوادونه هم باید د افغانان حق ته درناوی ولري.»
ملي دفاع وزارت له امریکا غوښتي چې افغانستان ته د یادو ټولو الوتکو د رالېږدولو په برخه کې خنډونه جوړ نه کړي، بلکې افغانانو ته یې وسپاري.
له دې مخکې د افغانستان د ملي دفاع وزارت سرپرست مولوي محمدیعقوب مجاهد له هغو هېوادونو چې د افغانستان چورلکې او پوځي الوتکې ورسره دي، په ټینګار سره غوښتي وو چې دغه الوتکې افغانستان ته وسپاري او افغانستان دې غبرګون ته نه اړ کوي.
GET IN TOUCH
NEWSLETTER
SUGGEST A STORY
PAJHWOK MOBILE APP