<p style="text-align: justify;">کندهار (پژواک، ۲۲ سلواغه ۱۴۰۳): د کندهار د کور او ښار جوړولو ریاست مسوولین وایي چې د دغه ولایت په درېیو ولسوالیو کې راستنو شوو کډوالو ته ښارګوټي جوړېږي او په دامان ولسوالۍ کې د یوه ښارګوټي جوړولو چارې عملاً پیل شوې دي.</p>
<p style="text-align: justify;">د کندهار د کور او ښار جوړولو رییس مولوي عبدالمتین عاشق له پژواک خبري اژانس سره په خبرو کې وویل، دا مهال په دامان ولسوالۍ کې پر ۱۴۰۰ جریب ځمکه د یوه ښارګوټي جوړولو لومړني کارونه روان دي او په دوو پړاوونو کې به بشپړ شي.</p>
<p style="text-align: justify;">نوموړي زیاته کړه چې د دغه ښارګوټي لپاره ۱۲.۵ میلیون افغانۍ بودجه ځانګړې شوې او په کې د اوبو برمې، ښوونځي، جوماتونه، پارکونه او نور اړین تاسیسات جوړېږي.</p>
<p style="text-align: justify;">د نوموړي په خبره: «په دغه ښارګوټي کې ټول امکانات په پام کې نیول شوي؛ دلته به نومرې په درې ډوله وېشل کېږي، پنځه بسوې، لس بسوې او پنځلس بسوې؛ یعنې هغه کورنۍ چې غړي یې زیات وي، لویې نومرې به ورکول کېږي او هغه چې کوچنۍ کورنۍ وي، کوچنۍ نومرې ورکول کېږي.»</p>
<p style="text-align: justify;">د کور او ښار جوړولو رییس دغه راز وویل چې یادو کورنیو ته د ځمکو د ملکیت سندونه هم ورکول کېږي خو کورونه باید هغوی پر خپل لګښت جوړ کړي.</p>
<p style="text-align: justify;">د هغه په وینا، که چېرې کوم چا د کور جوړولو وس نه درلود، د دوی مرکزي کمېسیون به په دې اړه مشوره کوي او که امکانات موجود وو، د کور جوړولو برخه کې به هم همکاري وکړي.</p>
<p style="text-align: justify;">ده پر موسساتو او خیریه بنسټونو غږ وکړ چې له بېرته راستنو شوو کورنیو سره د کورونو په جوړولو کې همکاري وکړي؛ ځکه دغه کورنۍ لا ډېرو مرستو ته اړتیا لري.</p>
<p style="text-align: justify;">عاشق دغه راز وویل، د کندهار په تختهپل او ژېړۍ ولسوالیو کې هم د دوو ښارګوټو لپاره د ځمکې سروې روانه ده.</p>
<p style="text-align: justify;">هغه زیاته کړه: «د کندهار په تختهپل او ژېړۍ ولسوالیو کې هم د درې درې زره جریبه ځمکې سروې روانه ده او هلته به هم ښارګوټي جوړیږي او موږ هڅه کوو چې لا ډېرو راستنو شوو کورنیو ته چې سرپناه نه لري، ځمکې ورکړو.»</p>
<p style="text-align: justify;">بلخوا، په کندهار کې هغه کسان چې ځمکې او کورونه نه لري وایي چې دوی ته هم باید ځمکې ورکول شي؛ ځکه دوی هم د سرپناه حق لري.</p>
<p style="text-align: justify;">د کندهار د دامان ولسوالۍ اوسېدونکی عبدالله په دې اړه وایي: «دا خو ډېر ښه کار دی چې کډوالو ته ځمکې ورکول کېږي خو موږ ته هم باید ځمکې راکول شي چې خپل یو کور ورباندې جوړ کړو، موږ هم بېکوره یو او کلونه کېږي د نورو په کورونو کې اوسېږو.»</p>
<p style="text-align: justify;">د دامان ولسوالۍ ښارګوټي کې پر کار بوخت کسان وايي، خوښ دي چې د کار زمینه ورته برابره شوې او د هېواد په ودانولو کې برخه اخلي.</p>
<p style="text-align: justify;">یوه کارګر عزتالله په دې اړه وویل: «موږ اوس مهال د دغه ښارګوټي د سړکانو او پلونو جوړولو چارې مخې ته وړو، نو خوشحاله یو چې دلته د کار زمینه راته برابره شوې ده او نورو هېوادونو ته له تګ څخه راګرځېدلي یو.»</p>
<p style="text-align: justify;">په دې وروستیو کې له ګاونډیو هېوادونو هېواد ته سلګونه زره افغانان بېرته راستانه شوي چې اکثره یې سرپناه نه لري، خو مسوولین وایي، ژمن دي چې دوی ته به د کورونو لپاره ځمکې ورکوي.</p>
