ګردېز (پژواک، ۲۸ سلواغه ۱۴۰۳): د پکتيکا د مرکز ښرنې د يو شمېر توليدي فابريکو مسوولين وايي چې د دولتي برېښنا او د صنعتي پارک نشتوالي يې پر کارونو منفي اغېز کړی او دوی یې له ستونزو سره مخ کړي دي.
هغوی وايي، د صنعتي پارک د نشتون له امله ټولې کارخونې د ښار اړوند شخصي ځايونو کې فعالې دي چې کرايې يې لوړې او له بل پلوه چاپېريال او خلکو ته هم زيان رسوي.
په مرکز ښرنه کې د پلاستيکي کڅوړو جوړولو د يوې کارخونې مالک نور محمد پژواک خبري اژانس ته وويل چې د دولتي برېښنا نشتون له امله کارخونه په لمريزه برېښنا چلوي خو په ژمي کې بیا د وريځو له امله بطرې نه چارجېږي او د کارخونې فعالیت ولاړ وي.
ده زياته کړه: «دوه کاله کېږي چې دا فابريکه مې فعاله کړې ده، پنځهنيم ميليونه لګښت مې پرې کړی خو اوس ځکه بنده ده چې برېښنا نشته کله چې منظمه برېښنا نه وي بيا موږ ته ضايعات ډېر کوي، زموږ تر ټولو لويه ستونزه د برېښنا ده، که برېښنا وي دلته به ډېرې فابريکې فعالې شي. بل کارخانې ټولې په شخصي ځايونو کې دي نو صنعتي پارک بايد جوړ شي.»
دغه راز، په مرکز ښرنه کې د يوې بلې کارخونې مالک نيازمحمد چې د ماشومانو پاپړ توليدوي پژواک ته وويل چې په يوه شخصي کور کې يې کارخونه فعاله کړې ده.
هغه وويل، د شخصي ځايونو کرايې لوړې دي او که صنعتي پارک ورته جوړ شي د دوی کاروبار به ورسره وغوړيږي او توليدات به يې هم يو څه ارزان شي.
دی زیاتوي: «زموږ د فابريکو غټ مشکل د برېښنا دی، که څه هم اوس زما کارخانې ته د پاملرنې موسسې لهخوا د سولر برېښنا سيسټم برابر شوی خو بيا هم موږ زياتې برېښنا ته اړتيا لرو، دویمه خبره دا چې موږ په شخصي کورونو کې فابريکې فعالې کړې چې کرايې يې ډېرې لوړې دي نو که صنعتي پارک جوړ شي موږ به له کرايې خلاص شو او د خپل توليد قيمت به هم يو څه را ټيټ کړو.»
یو شمېر نورو کسانو هم ورته څرګندونې وکړې او د یادو ستونزو د حل غوښتنه یې وکړه.
بل لورته، د پکتيکا د صنعت او سوداګري رياست د یادو ستونزو د حل ډاډ ورکوي.
د پکتيکا د صنعت او سوداګرۍ رياست وياند شعيب بيان پژواک ته وويل چې د صنعت ودې او پراختيا لپاره د صنعتي پارک لپاره زر جريبه ځمکه ځانګړې شوې ده.
هغه زياتوي چې د پارک جوړېدو او د ځمکو د وېش چارې به يې هم ژر پيل شي.
هغه دغه راز زياته کړه چې ولايتي اداره هڅه کوي چې راتلونکي ۱۴۰۴ هجري کال کې پکتيکا ته د ورادتي برېښنا چارې هم پيل کړي.
دا په داسې حال کې ده چې د پکتیکا ترڅنګ په یو شمېر نورو ولایتونو کې هم د تولیدي کارخونو مسوولین له ورته ستونزو شکایت کوي او پر حل یې ټینګار کوي.
