کابل (پژواک، ۲۸ سلواغه ۱۴۰۳): د کډوالو چارو وزارت په کوېټه کې د پاکستاني پولیسو له خوا د یو شمېر افغان کډوالو پر کورونو د چاپې وهلو خبر ورکړی، دغه کار یې غندلی او له نړۍوالو بنسټونو یې غوښتي چې له پاکستانه د افغان کډوالو د باعزته راستنېدو برخه کې همکاریو ته دوام ورکړي.
یاد وزارت نن (یکشنبه، د سلواغې ۲۸مه) پر خپله اېکسپاڼه لیکلي: «پاکستاني پولیسو د روان لمریز کال د سلواغې په ۲۷مه په کوېټه ښار او کچلاغ سیمه کې د شپې ناوخته د یو شمېر افغان مهاجرینو پر کورونو چاپې وهلې او یو شمېر افغانان یې په زور له کورونو ایستلي او ناسم چلند یې ورسره کړی دی.»
خبرپانه کې زیاته شوې، پاکستاني پولیسو یو شمېر افغان کډوال چې ۶۵ ماشومان او ۳۰ ښځې په شامل دي، د سپین بولدک له لارې هېواد ته را اړولي دي.
د یاد وزارت په اعلامیه کې دغه راز راغلي، د پاکستان حکومت په تېرو دوو کلونو کې د ټولو نړۍوالو اسلامي قوانینو او اصولو خلاف د افغان کډوالو پر وړاندې دا ډول کړنې څو څو ځلې تکرار کړې او لا هم دوام لري.
سرچینه کاږي: «د افغانستان اسلامي امارت د کډوالو او راستنېدونکو چارو وزارت دغه ډول کړنې غندي او له نړۍوالو بنسټونو غواړي چې په هغه هېواد کې دې له افغان کډوالو سره خپلو مرستو او همکاریو ته دوام ورکړي څو په باعزته توګه خپل هېواد ته راستانه شي.»
دا په داسې حال کې ده چې د روان کال د سلواغې میاشتې په ۲۵مه هم د پاکستان له زندانونو ۶۳ افغانان خوشي او خپل هېواد ته راستانه شول.
