غزني کې د ۲۴ لوبډلو ترمنځ د فوټسال سیالۍ پیل شوې

غزني ښار (پژواک، ۱۹ کب ۱۴۰۳): د غزني بدني روزنې او ورزش امریت وایي، د دغه ولایت په مرکز کې د ۲۴ لوبډلو ترمنځ د رمضان جام فوټسال سیالۍ پیل شوې.

د غزني بدني روزنې او ورزش امر بلال مجاهد پژواک خبري اژانس ته وویل، په الکوزي ورزشي جمنازیوم کې د ۲۴ لوبډلو ترمنځ د فوټسال سیالۍ پیل شوې چې یوه میاشت به دوام وکړي.

نوموړي وویل، د دغه جام په لومړۍ لوبه کې «اټک غزنه» لوبډلې وکولای شول خپلې سیالۍ عقاب سیاه لوبډلې ته اته د دوو پر وړاندې ماتې ورکړې.

دغه راز، د یادو سیالیو یوه لوبغاړي احمد زبیر پژواک ته وویل، خوښ دی چې دغه ډول سیالۍ په لاره اچول شوې دي.

هغه غوښتنه وکړه چې دوی ته دې په دغه ولایت کې معیاري ورزشي ډګرونه جوړ شي.

دا په داسې حال ده چې په غزني کې د والیبال او کرکټ رمضان جام سیالۍ هم پيل شوې دي.