<p style="text-align: justify;">محمودراقي (پژواک، ۱۶ وری ۱۴۰۴): ځایي مسوولین وایي چې نن د کاپیسا د باغدرې برېښنا بند د امکان سنجۍ، جیوفزیک او جیوتخنیک مطالعات د عینک مسو قراردادي چینایي کمپنۍ له خوا پیل شول.</p>
<p style="text-align: justify;">دغه بند چې کاپیسا ولایت مرکز کې موقعیت لري، د امکان سنجۍ، جیوفزیک او جیوتخنیک مطالعاتو هوکړهلیک یې د تېر کال د لېندۍ میاشتې په ۱۱مه د اوبو او انرژۍ وزارت او د عینک مسو قراردادي شرکت ترمنځ لاسلیک شوی و.</p>
<p style="text-align: justify;">د دغه تړون له مخې، یاد چینایي شرکت مکلف دی چې اتو میاشتو کې د دغه بند د امکان سنجۍ، جیوفزیک او جیوتخنیک مطالعات تر سره کړي.</p>
<p style="text-align: justify;">د اوبو او انرژۍ وزارت سرپرست ملا عبدالطیف منصور د دغه تړون د لاسلیک کېدو پرمهال د لوګر ولایت د عینک مسو پروژې د برېښنا د تامین په برخه د باغدرې بند پروژې له اهمیته یادونه کړې وه او ویلي یې وو چې د باغدرې بند پروژې تطبیق به د چین او افغانستان ترمنځ د ګډو همکاریو یوه مهمه لاستهراوړنه وي.</p>
<p style="text-align: justify;">د کاپیسا ولایت د مقام ویاند عبدالعزیز نظري، د دغه بند د تولید ظرفیت ۲۲۶ تر ۲۴۰ میګاواټه یاد کړ او له جزییاتو ورکولو پرته یې وویل چې له هغه به پنځه ولایتونه مستفید شي.</p>
<p style="text-align: justify;">هغه وایي چې دا لویه پروژه به په درېیو پړاونو کې بشپړه شي.</p>
<p style="text-align: justify;">نظري پژواک ته وویل چې نن (د وري ۱۶مه) د دغه ولایت په مرکز کې د یاد بند د امکان سنجۍ، جیوفزیک او جیوتخنیک مطالعات، سیمې ته د ماشینرۍ په انتقال سره پیل شول.</p>
<p style="text-align: justify;">هغه وایي: «ټاکل شوې امسيسي –جيسيال کمپنۍ اتو راتلونکو میاشتو کې د باغدرې بند لابرتواري، جیوفزیک او جیوتخنیک څېړنې ترسره کړي.»</p>
<p style="text-align: justify;">هغه وویل چې د اوبو او انرژۍ وزارت به د تړون مطابق له دغه شرکت سره همکاري وکړي.</p>
