کابل (پژواک، ۳۱ وری ۱۴۰۴): د افغانستان کرکټ بورډ وایي، افغان ابدالیان کرکټ لوبډله په درې اړخیزه لوبلړۍ کې سبا خپله درېیمه یو ورځنۍ لوبه د ایرلینډ له الف لوبډلې سره کوي.
د افغانستان کرکټ بورډ نن پر خپله فېسبوکذپاڼه لیکلي چې افغان ابدالیان لوبډله به په درې اړخیزه لوبلړۍ کې د خپلې درېیمې لوبې په موخه د ایرلینډ الف لوبډلې پر وړاندې د سیالۍ ډګر ته کښته شي.
سرچینې ویلي، دغه لوبه به د کابل پر وخت سهار لسنیمې بجې د متحده عربي اماراتو د ابوظبۍ په زاید کرکټ لوبغالي کې پیل شي.
د کرکټ بورډ د معلوماتو له مخې، افغان ابدالیان لوبډلې د ایرلینډ الف لوبډلې پر وړاندې د سبانۍ لوبې لپاره تمرینات ترسره کړل.
په دغو سیالیو کې افغان لوبډلې خپله لومړی لوبه د سریلانکا الف لوبډلې ته بایللې خو دویمه لوبه کې یې بیا د ایرلینډ الف لوبډلې ته ماته ورکړه.
دغه درې اړخیزه سیالۍ د افغان الف «افغان ابدالیان»، د سریلانکا الف او ایرلینډ الف لوبډلو ترمنځ په متحده عربي اماراتو کې د افغانستان په کوربهتوب روانې دي.
GET IN TOUCH
NEWSLETTER
SUGGEST A STORY
PAJHWOK MOBILE APP