اوزبېکستان له افغانستان سره د کرنې د نوو مېتودونو زده‌کړې برخه کې مرسته کوي

<p style="text-align: justify;">مزارشریف (پژواک، ۹ غویی ۱۴۰۴): د کرنې، اوبولګولو او مالدارۍ وزارت مسوولین وایي، اوزبېکستان غواړي د کرنې او اوبو لګولو د نوو مېتودونو زده‌کړې برخه کې له افغانستان سره مرسته وکړي.</p>

<p style="text-align: justify;">نن د اوزبېکستان د کرنې وزارت د مرستیال په مشرۍ یو پلاوی بلخ ولایت ته راغلی و.</p>

<p style="text-align: justify;">دغه پلاوي د افغانستان د کرنې وزارت او د بلخ له ځایي مسوولینو سره ولیدل او ترڅنګ له یو شمېر فابریکو هم لیدنه وکړه.</p>

<p style="text-align: justify;">د کرنې، اوبولګولو او مالداري وزارت ویاند مصباح‌الدین مستعین په بلخ کې له رسنیو سره په خبرو کې وویل، د اوزبېکستان د کرنې وزارت د مرستیال په مشرۍ یو پلاوی د دغه وزارت په بلنه په دوه ورځني سفر بلخ ولایت ته راغلی و، دغلته یې له افغان مسوولینو سره ولید او له یو شمېر تولیدي فابریکو یې لیدنه وکړه.</p>

<p style="text-align: justify;">مستعین زیاته کړه، دغه پلاوی غواړي په بلخ کې د امو سیند د تخریباتو مخنیوي برخه کې د مرستې ترڅنګ د کرنې او اوبو لګولو نوي سيسټمونو او مېتودونو برخه کې خپلې تجربې له افغانانو سره شریکې کړي.</p>

<p style="text-align: justify;">هغه دغه راز وویل، یاد پلاوي له خپل سفر سره هم‌مهاله د وریجو او پنبې ۲۰ ټنه اصلاح شوي تخمونه هم راوړي او دغه راز به په بلخ کې پر لس هکټاره ځمکه د اوبو لګولو نوی سيسټم هم فعال کړي.</p>

<p style="text-align: justify;">د نوموړي په خبره، یاد پلاوی به په افغانستان کې له یو شمېر هغو خصوصي شرکتونو سره هم د همکارۍ او ماشینونو د پېرېدو تړونونه لاسلیک کړي چې د کرنې برخه کې فعالیت کوي.</p>

<p style="text-align: justify;">د نوموړي د معلوماتو له مخې، له اوزبېکستانه د راغلي پلاوي په ترکیب کې د دغه هېواد د کرنې وزارت د تحقیق او ترویج معینان، د اوبو او انرژۍ وزارت مرستیال او یو تخنیکي ټیم هم شامل دي.</p>

<p style="text-align: justify;">د یادونې ده، په بلخ کې یو شمېر کروندګر هم خوښي څرګندوي چې اوزبېکستان هېواد ورسره د کرنې د نوو مېتودونو زده‌کولو برخه کې مرسته کوي.</p>