ډونالډ ټرمپ له احمد الشرع سره لیدلي

<p style="text-align: justify;">کابل (پژواک، ۲۴ غویی ۱۴۰۴): د راپورونو له مخې، د امریکا ولسمشر ډونالډ ټرمپ په سعودي عربستان کې د سوریې له موقت ولسمشر احمد الشرع سره لیدلي او د ترکیې ولسمشر رجب طیب اردوغان هم په دې ناسته کې په انلاین ډول ګډون کړی دی.</p>

<p style="text-align: justify;">دا راپور الجزیرې خپور کړی، خو په دې اړه یې ډېر جزئیات نه دي ورکړي.</p>

<p style="text-align: justify;"> دا لیدنه په داسې حال کې شوې چې د امریکا ولسمشر ډونالډ ټرمپ پرون ویلي وو چې پر سوریې یې بندیزونه لغوه کړي دي، ټرمپ ویلي وو چې دا اقدام سوریې ته د عظمت فرصت ورکوي.</p>

<p style="text-align: justify;">د ترکیې انادولي اژانس هم راپور ورکړی چې دې ناسته کې د ترکیې ولسمشر رجب طیب اردوغان د امریکا له ولسمشر ډونالډ ټرمپ، د سوریې له ولسمشر احمد الشرع او د سعودي له ولیعهد محمد بن سلمان سره ګډون کړی و.</p>

<p style="text-align: justify;">اردوغان د ترکیې، امریکا، سوریې او سعودي څلور اړخیزه انلاین ناسته کې ویلي چې د واشنګټن له خوا پر سوریې د تحریمونو د لغوه کولو پرېکړه تاریخي اهمیت لري.</p>