غزه کې د اسرائیلو په بریدونو کې ۳۰ فلسطینیانو ژوند له لاسه ورکړی

کابل (پژواک، ۲۹ غويی ۱۴۰۴): د راپورونو له مخې، اسرائیلو د غزې تړانګې اړوند خان‌یونس سیمه کې پر ملکي وګړو هوايي بریدونه کړي او له امله یې په یو ساعت کې لږ تر لږه ۳۰ فلسطینیانو ژوند له لاسه ورکړی دی.

د الجزیرې د راپور له مخې، اسرائیلو دغه بریدونه نن سهار کړی او په یاده سیمه کې د «ناصر» روغتون هم تر برید لاندې راغلی دی.

سرچینه لیکي چې اسرائیلو د غزې سوېل کې خپلو ځمکنیو عملیاتو ته هم زور ورکړی دی.

د راپورونو له مخې، د اسرائیلو د بریدونو له پیل راهیسې په غزه کې ۵۳ زره او ۳۳۹ فلسطینیانو ژوند له لاسه ورکړی او څه باندې ۱۲۱ زره نور ټپیان شوي دي.