کابل (پژواک، ۲۵ غبرګولی ۱۴۰۴): د افغانستان د المپیک ملي کمېټه وایي چې د هېواد د پهلوانۍ ملي لوبډلې د «ګریګورمن» سبک د «تختي جام» نړۍوالو سیالیو کې درېیم مقام خپل کړی دی.
د المپیک، بدني روزنې او سپورټ لوی ریاست نن پر خپله اېکسپاڼه لیکلي، د هېواد د پهلوانۍ ملي فدراسیون ۱۴ کسیزې ملي لوبډلې د پهلوانۍ د ګریګورمن سبک «تختي جام» په نوم نړۍوالو سیالیو کې درېیم مقام ګټلی دی.
سرچینې لیکلي، یادې سیالۍ د افغانستان په ګډون د اوو هېوادونو لوبغاړو ترمنځ د غبرګولي په ۲۲مه د ایران په شېراز ښار کې پیل شوې وې چې پرون پای ته ورسېدې.
د المپیک ملي کمېټې د معلوماتو له مخې، په دغو سیالیو کې کوربه ایران د ۲۵۰ نومرو په ترلاسه کولو سره لومړی، ترکیې د ۲۸ نومرو په اخیستو دویم او افغانستان د ۱۲ نومرو په ترلاسه کولو سره درېیم ځایونه خپل کړي دي.
د یادونې ده، د افغانستان د پهلوانۍ ملي لوبډلې ۱۴ لوبغاړي په دغو سیالیو کې د ګډون په موخه د روانې غبرګولې میاشتې په ۱۶مه ایران ته تللي دي.
GET IN TOUCH
NEWSLETTER
SUGGEST A STORY
PAJHWOK MOBILE APP