<p style="text-align: justify;">کابل (پژواک، ۲۰ چنګاښ ۱۴۰۴): د بهرنیو چارو وزارت سرپرست له خپل قزاقستاني سیال سره په لیدنه کې ویلي، اوس د دې وخت رارسېدلی چې د دواړو هېوادونو ترمنځ شته مثبت تعامل پر دوامداره او اوږدمهاله همکاریو بدل شي.</p>
<p style="text-align: justify;">د بهرنیو چارو وزارت په خبرپاڼه کې راغلي چې د دغه وزارت سرپرست مولوي امیرخان متقي د قزاقستان د بهرنیو چارو له وزیر مرات نورتلیو سره وکتل.</p>
<p style="text-align: justify;">خبرپاڼه کې راغلي، په دې لیدنه کې دواړو لورو د دوه اړخیزه اړیکو پر پراختیا او د اقتصادي همکاریو، سیمهییزو فرصتونو، ترانزیټي پروژو او سیاسي تفاهم پر زیاتوالي هر اړخیز بحث وکړ.</p>
<p style="text-align: justify;">متقي په دغه لیدنه کې هیله څرګنده کړې چې د سیاسي او اقتصادي تعامل د لا پراختیا په موخه له رامنځته شوو فرصتونو مثبته استفاده وشي.</p>
<p style="text-align: justify;">هغه ویلي، قزاقستان له هغو هېوادونو دی چې له پیل راهیسې یې د افغانستان اړوند رغنده دریځ غوره کړی او اوس د دې وخت رارسېدلی چې دا مثبت تعامل پر دوامداره او اوږدمهاله همکاریو بدل شي څو د دواړو هېوادونو ترمنځ باور او شراکت لا پراخه شي.</p>
<p style="text-align: justify;">د قزاقستان د بهرنیو چارو وزیر هم ویلي، اراده لري له افغانستان سره خپلې سیاسي اړیکې، اقتصادي او علمي همکارۍ لا پراخه کړي.</p>
<p style="text-align: justify;">هغه ویلي، غواړي په اوږدمهال کې د افغانستان په ثبات، ترانزیټ، د خوړو امنیت او په ټوله کي د دغه هېواد په هر اړخیز پرمختګ کې مثبت رول ولوبوي.</p>
<p style="text-align: justify;">یاد وزارت لیکلي، د لیدنې په پای کې دواړو لورو د تورغونډي - هرات د اوسپنۍ پټلۍ په برخه کې له لاسلیک شوې هوکړې خوښي څرګنده کړه او د تخنیکي ټیمونو ترمنځ د دوامداره ګډ کار پر دوام یې ټینګار وکړ.</p>
<p style="text-align: justify;">دا په داسې حال کې ده چې تېره ورځ په کابل کې د هرات – تورغونډۍ اوسپنې پټلۍ پروژه کې د قزاقستان له لوري د ۵۰۰ میلیون ډالرو په ارزښت د پانګونې هوکړه لیک لاسلیک شو.</p>
