<p style="text-align: justify;">کابل (پژواک، ۲۴ چنګاښ ۱۴۰۴): د بهرنیو چارو وزارت سرپرست د ملګرو ملتونو د نشهيي توکو او جرمونو د دفتر له عملیاتي رییس سره په لیدنه کې د نشهيي توکو پر وړاندې د اسلامي امارت مبارزه تاریخي بللې او له نړۍوالو یې غوښتي چې افغان کروندګرو ته د بدیل معیشت برابرولو برخه کې همکاري وکړي.</p>
<p style="text-align: justify;">د بهرنیو چارو وزارت په خبرپاڼه کې راغلي چې د دغه وزارت سرپرست مولوي امیرخان متقي د ملګرو ملتونو د نشهیي توکو او جرمونو د دفتر (UNODC) له عملیاتي رییس بو ماتیاسن او مل پلاوي سره وکتل.</p>
<p style="text-align: justify;">متقي په دغه لیدنه کې ویلي، د هېواد ټول ارګانونه او امنیتي ځواکونه په جدي ډول د نشهیي توکو له پدیدې سره د مبارزې هوډ لري او اجازه نه ورکوي چي یو ځل بیا له دې پدېدې هېواد او سیمه زیانمن شي.</p>
<p style="text-align: justify;">خبرپاڼه کې راغلي، متقي په نړۍوالو ږغ وکړ چې افغان کروند ګرو ته د بدیل معیشت، د عایداتو قانوني سرچینې برابرولو او د مالدارۍ، کرنې او کوچنیو تولیدي فعالیتونو د رامنځته کولو په برخه کې همکاري وکړي.</p>
<p style="text-align: justify;">یاد وزارت لیکلي، متقي په دغه لیدنه کې اندیښنه څرګنده کړه چې له بهر څخه د نشهيي توکو قاچاق د افغانستان لپاره یو جدي ګواښ ګرځېدلی دی او له نړۍوالې ټولنې څخه یې وغوښتل چې د یادې ستونزې د حل لپاره عملي ګامونه پورته کړي.</p>
<p style="text-align: justify;">بهرنیو چارو وزارت لیکلي چې د ملګرو ملتونو دغه استازي د نشهیي توکو پر وړاندې د اسلامي امارت پرېکنده اقدامات وستایل.</p>
<p style="text-align: justify;">د سرچینې د معلوماتو له مخې، یاده لیدنه کې دواړو لورو د مخدره توکو پر وړاندې پر غیرسیاسي مبارزې، بشري همکاریو پر دوام او د نشهيي توکو د مخنیوي په اړه د اغېزناکو ناستو پر ترسره کېدو ټینګار وکړ.</p>
