<p style="text-align: justify;">کابل (پژواک، ۲۱ زمری ۱۴۰۴): د افغانستان د بدن ښکلا او فټنس فدراسیون وایي چې د هېواد د بدن ښکلا او فټنس ملي لوبډلې لپاره په بېلابېلو وزني کټګوریو کې ۵۴ ورزشکاران وټاکل شول.</p>
<p style="text-align: justify;">کابل کې درې ورځې مخکې د بدن ښکلان او فټنس ملي لوبډلې ته د غوره لوبغاړو ټاکلو په موخه سیالۍ پیل شوې وې چې نن پای ته ورسېدې.</p>
<p style="text-align: justify;">په دې تړاو جوړ شوو مراسمو کې د المپیک، بدني روزنې او ورزش عمومي رییس مولوي احمدالله وثیق وویل، په کابل کې د بدن ښکلا ټاکنیزې سیالۍ ترسره شوې چې له بېلابېلو ولایتونو کې پهکې لوبغاړو ګډون کړی دی.</p>
<p style="text-align: justify;">هغه زیاته کړه، د ورزش په برخه کې لاستهراوړنې ورځ تر بلې ډېریږي او په خبره یې چې دوی هڅه کوي څو ورزشکارانو ته په بېلابېلو برخو کې امکانات برابر کړي.</p>
<p style="text-align: justify;">نوموړي ورزشکارانو ته ډاډ ورکړ چې د دوی همکاري او ملاتړ به کوي.</p>
<p style="text-align: justify;">په یادو مراسمو کې د بدن ښکلا او فټنس فدراسیون رییس باور هوتک وویل چې د ملي لوبډلې لپاره اتلسم پړاو ټاکنیزو سیالیو کې له ۲۳ ولایتونو ۲۵۶ ورزشکارانو کډون کړی و.</p>
<p style="text-align: justify;">هغه زیاته کړه، په دغو سیالیو کې په نهو بېلابېلو وزني کټګوریو کې ۲۷ ورزشکاران د بدن ښکلا برخه کې او ۲۷ ورزشکاران د سپورټ فزیک برخه کې د هېواد ملي لوبډلې لپاره وټاکل شول.</p>
<p style="text-align: justify;">نوموړی وایي، څه وخت وروسته په ټایلنډ کې اسیایي سیالۍ ترسره کېږي او له افغانستانه به پهکې همدغه ورزشکاران په بېلابېلو کټګوریو کې ګډون وکړي.</p>
<p style="text-align: justify;">وحیدالله صدیقي چې د دغو سیالیو د فټنس برخه کې یې د ۱۷۵ سانتي قد کټګورۍ کې لومړی مقام ترلاسه کړی، پژواک خبري اژانس ته وویل، دغو سیالیو ته یې پوره چمتووالی نیولی و او خوښ دی چې لومړی مقام یې ترلاسه کړ.</p>
<p style="text-align: justify;">هغه وایي، هیله یې دا ده چې په نړۍوالو سیالیو کې ګډون وکړي او د افغانستان لپاره ویاړ راوړي.</p>
<p style="text-align: justify;">نوموړي له مسوولینو غوښتنه وکړه چې د بدن ښکلا او فټس له ورزشکارانو سره دې په بېلابېلو برخو کې همکاري وکړي او هغوی ته دې په نړۍوالو سیالیو کې د ګډون زمینه برابره کړي.</p>
<p style="text-align: justify;">دغه راز، بل ورزشکار ویس نوري چې په دغو سیالیو کې یې د ۶۵ کیلوګرامه وزن کټګورۍ کې د بدن ښکلا برخه کې لومړی مقام ګټلی وایي، یادو سیالیو ته یې له تېرو دوو میاشتو راهیسې بشپړ چمتووالی نیولی و او وتوانېد څو لومړی مقام ترلاسه کړي.</p>
<p style="text-align: justify;">هغه هم د المپیک ملي کمېټې او بدن ښکلا او فټنس فدراسیون له مسوولینو غوښتنه وکړه چې د دې برخې د ورزشکارانو ملاتړ وکړي.</p>
