<p style="text-align: justify;">کابل (پژواک، ۱۸ تله ۱۴۰۴): د افغانستان پخواني ولسمشر حامد کرزي پر «کابل او پکتیکا» د پاکستان هوايي بریدونه په سختو ټکو غندلي او هغه یې له نړۍوالو قوانینو څخه ښکاره سرغړونه، د حاکمیت نقض او د افغانستان پر حریم تېری بللی دی.</p>
<p style="text-align: justify;">د افغانستان مخکیني ولسمشر پر خپله اېکسپاڼه لیکلي چې «د افغانستان او سیمې پر وړاندې د پاکستان پالیسۍ غیرمسوولانه دي او ناوړه پایلې پکې په پام کې نه نیول کېږي او هغه ستونزې چې نن پاکستان ورسره لاس او ګرېوان دي، د همدغو ناسمو پالیسیو پایلې دي.»</p>
<p style="text-align: justify;">هغه ټینګار وکړ چې پاکستان باید د تاوتریخوالي پر ځای د ګاونډیتوب حقونو او نړۍوالو قوانینو ته په کتو، پر خپلو ناسمو او زیان رسوونکې پالیسیو بیا غور وکړي او د دوستانه او ښو اړیکو له مخې له افغانستان سره د تعامل لاره غوره کړي.</p>
<p style="text-align: justify;">دا په داسې حال کې ده چې تېره شپه په کابل کې چاودنه وشوه.</p>
<p style="text-align: justify;">له دې چاودنې وروسته د اسلامي امارت ویاند ذبیحالله مجاهد پر خپله اېکسپاڼه ولیکل چې په کابل ښار کې د یوې چاودنې غږ اورېدل شوی دی.</p>
<p style="text-align: justify;">هغه ویلي وو چې په دې اړه پلټنې روانې دي او تر اوسه د مرګژوبلې په اړه کوم راپور نه دی ورکړل شوی.</p>
<p style="text-align: justify;">دغهراز، سیمهییزو سرچینو ویلي چې تېره شپه پاکستان د پکتیکا ولایت په برمل ولسوالۍ کې مرغه بازار بمبار کړی چې له امله یې درې دوکانونه سوځېدلي، خو مرګژوبله یې نه ده اړولې.</p>
<p style="text-align: justify;">اسلامي امارت تر اوسه په دې اړه څه نه دي ویلي.</p>
