پلعلم (پژواک، ۱۸ لړم ۱۴۰۴): د لوګر ولايت د امنيې قوماندانۍ وايي، امنيتي ځواکونو په مرکز پل علم ښار کې هغه دوه کسان نيولي چې د يوې ښځې او يوې نجلۍ په وژنه تورن دي.
د دغه ولايت د امنيې قوماندانۍ وياند مولوي احمدالله انس پژواک خبري اژانس ته وويل، دا پېښه د شنبې په شپه د پل علم ښار اړوند د «عمراباد» په سيمه کې په يوه کور کې رامنځته شوې ده.
نوموړي زياته کړه، يادو کسانو لومړی يوه ۶۰ کلنه ښځه او يوه ۱۲ کلنه نجلۍ بېهوښه کړې او بيا يې د تبر په وسيله وژلې دي.
هغه زياته کړه، تورنو کسانو له ياد کور څخه دوه سوه زره افغانۍ او څلور زره ډالره هم له ځان سره وړي دي.
انس وايي، د پېښې دواړه قاتلان د امنيتي ځواکونو له لوري نيول شوي او په خپل جرم يې اعتراف کړی دی.
د ورکړل شويو معلوماتو له مخې، ياد کسان به له څېړنو وروسته عدلي او قضايي ارګانونو ته وسپارل شي.
